Ички ишлар вазирлиги Академияси билан ҳамкорликни ривожлантириш масалалари муҳокама қилинди

2020 йил 24 сентябрь куни Бош прокуратура Академиясида Академия раҳбарияти ҳамда Ички ишлар вазирлиги Академияси бошлиғининг биринчи ўринбосари М.Зиёдуллаев бошчилигидаги бир гуруҳ ходимлари ўртасида учрашув бўлиб ўтди.

Мазкур учрашув ҳуқуқни муҳофаза қилиш органлари кадрларини тайёрлаш, қайта тайёрлаш ва малакасини ошириш соҳасида икки томонлама ҳамкорликни ривожлантириш масалаларини муҳокама қилиш мақсадида ташкил этилди.

Иштирокчилар Академиянинг илғор таълим ва ахборот-коммуникация технологиялари, амалиётга йўналтирилган компетенциявий ёндашув, интерактив ва муаммоли методлар асосида ўқув жараёнини ташкил этиш борасидаги тажрибаси билан танишдилар.

Академиянинг ўз электрон платформаси негизида фаолият юритаётган ва коронавирус пандемияси шароитида алоҳида долзарблик касб этган электрон (масофавий) таълимни тизимли жорий этиш имконини берган «ProAcademy» ахборот-таълим портали меҳмонларда қизиқиш уйғотди.

Бўлиб ўтган учрашув замонавий стандартлар ва талабларга жавоб берадиган ҳуқуқни муҳофаза қилиш органлари ходимларини тайёрлаш соҳасида Академиялар ўртасидаги ҳамкорликни янада ривожлантиришга хизмат қилади.