Илмий консорциумнинг илк қадамлари

2019 йил 16 май куни суд ва ҳуқуқни муҳофаза қилиш фаолияти соҳасида идоралараро илмий тадқиқотларни ўтказиш ва уларни мувофиқлаштириш мақсадида Бош прокуратура Академияси, Тошкент давлат юридик университети, Судьялар олий кенгаши ҳузуридаги Судьялар олий мактаби, Ички ишлар вазирлиги Академияси, Миллий гвардия Ҳарбий-техник институти, Давлат хавфсизлик хизмати институти, Адлия вазирлиги қошидаги Юристлар малакасини ошириш маркази, Давлат божхона қўмитасининг Божхона институти, Давлат солиқ қўмитаси ҳузуридаги Малака ошириш маркази томонидан Қўшма қарор имзоланган эди.

Ушбу ҳужжат билан суд ва ҳуқуқни муҳофаза қилиш фаолияти соҳасида илмий тадқиқотларни ҳамкорликда самарали амалга ошириш ва уларнинг натижаларини ҳуқуқни қўллаш амалиётига кенг жорий қилиш, шунингдек ушбу йўналишдаги саъй-ҳаракатларни бирлаштиришга қаратилган Илмий-тадқиқот консорциум ташкил этилган.

Жорий йилнинг 1 июль куни Илмий консорциумнинг биринчи йиғилиши бўлиб ўтди. Унда Консорциум Кенгашининг иштирокчилари таркиби тасдиқланиб, Раиси сайланди. Шунингдек 2019-2020 йиллар учун иш режа ҳамда 12.00.07 – “Суд ҳокимияти. Прокурор назорати. Ҳуқуқни муҳофаза қилиш фаолиятини ташкил этиш. Адвокатура” ихтисослиги бўйича устувор диссертация мавзулари ишлаб чиқилди ва тасдиқланди.

Шу билар бирга, “Ҳуқуқни муҳофаза қилувчи органларнинг хуфиёна иқтисодиётга қарши курашишдаги фаолиятини такомиллаштириш” ва “ Олий таълим тизимида коррупцияга қарши курашнинг ташкилий-ҳуқуқий асосларини такомиллаштириш” каби долзарб мавзулар бўйича илмий тадқиқотлар ўтказишга доир келишувга эришилди.

Шунингдек, кун тартибидаги бошқа масалалар бўйича тегишли қарорлар қабул қилинди.