Жамоат хавфсизлигини таъминлаш самарадорлигини ошириш бўйича янги услуб ва минтақавий амалиётларни ривожлантириш

Бош прокуратура Академиясининг Қорақалпоғистон Республикаси ва Хоразм вилояти прокуратураларидаги доимий фаолият юритувчи штаблари фаолияти доирасида Академия раҳбарияти ва ходимлари томонидан ички ишлар ва прокуратура органларининг ҳуқуқбузарликлар профилактикаси, жиноятчиликка қарши курашиш ва жамоат хавфсизлигини таъминлаш соҳасидаги фаолиятининг самарадорлиги жойларда ўрганилди.

Мазкур ҳудудларда жиноятчилик аҳволини ўрганиш ва таҳлил қилиш давомида ҳудудий прокуратура ва ички ишлар органлари масъул ходимлари билан учрашувлар ташкил этилди, шунингдек, ҳуқуқбузарликлар профилактикаси тизимида қўлланилаётган механизмлар тизимлилиги ва самарадорлиги даражасини ошириш бўйича комплекс чора-тадбирлар амалга оширилди.

Жиноятчиликнинг олдини олишга қаратилган тадбирлар ҳамда ички ишлар органлари ходимлари фаолиятининг самарадорлигини баҳолаш мақсадида ҳудуддаги айрим туман ва шаҳарлар аҳолиси ўртасида ижтимоий сўров ўтказилди.

Ҳуқуқбузарликлар профилактикасида иштирок этувчи ташкилотлар ўртасида тезкор ахборот алмашиниш механизмларини яратиш мақсадида Қорақалпоғистон Республикасининг Нукус шаҳри, Нукус ва Хўжайли туманлари ҳамда Хоразм вилоятининг Урганч шаҳри ва Хонка туманларида «Профинспектор» махсус электрон дастури жорий этилди. Профилактика инспекторлари ҳамда ҳуқуқбузарликлар профилактикаси бўлинмаларининг раҳбар кадрлари учун мазкур дастурий таъминотдан фойдаланиш қоидаларини тушунтириш бўйича ўқув семинарлари ўтказилди.

Шунингдек, профилактика инспекторларининг билим даражаси, кўникма ва компетенцияларини аниқлаш бўйича диагностика тест синовлари ўтказилди.

Жиноятлар содир этилиши сабабларини тизимли таҳлил қилиш бўйича Нукус шаҳри ва Боғот тумани ҳудудий эксперт-таҳлил гуруҳларининг таркибига халқ депутатлари маҳаллий Кенгашларининг депутатлари жалб қилиниб, жиноятчилик аҳволини маҳаллалар кесимида муҳоқама қилиш, жиноятлар содир этилишига сабаб бўлган шарт-шароитларни бартараф этиш бўйича комплекс чора-тадбирларини ишлаб чиқиш ҳамда профилактика инспекторларининг фаолияти устидан жамоатчилик назоратини ўрнатиш тартиблари жорий этилди.

Бундан ташқари, ҳуқуқий маданиятни юксалтириш ва аҳолига юридик хизмат кўрсатиш мақсадида Қорақалпоқ давлат университети қошида ташкил этилган “Юридик клиника” фаолияти ўрганилиб, тегишли тавсиялар берилди.