Бош прокуратура Академияси магистратурасида масофавий таълим давом этмоқда

Бош прокуратура Академиясида магистратура тингловчилари учун масофавий ўқув машғулотлари ўқув дастурига мувофиқ ўтказилиши давом этмоқда.

Реал вақт режимида ўқув машғулотларни ўтказиш ва магистрлик диссертациялари доирасида тингловчилар томонидан илмий тадқиқотларни олиб бориш ҳолатини муҳокама қилишга карантин чоралари амал қилиб турган муддатда масофадан туриб меҳнат фаолиятини юритаётган Академиянинг профессор-ўқитувчилари фаол жалб этилмоқда.

Хусусан, Академиянинг кафедра доценти Г.Маликова томонидан 2020 йил 17 апрель куни “Қарор қабул қилиш техникаси” мавзусида навбатдаги машғулот ўтказилиб, унда тегишли қоида ва методларга риоя қилиш, қарорларни қабул қилиш техникасини, шунингдек қўйилган вазифаларга эришишга тўсқинлик қилувчи факторларни аниқлаш ва бартараф этиш кўникмаларини ўзлаштириш зарурлигига оид масалалар ёритилди.

Машғулот давомида магистратура тингловчилари реал вақт режимида бугунги кунда қарор қабул қилишга оид долзарб масалалар бўйича муҳокамаларни ўтказдилар, шунингдек унинг тегишли ижтимоий-ҳуқуқий жиҳатларини кўриб чиқдилар.