Бош прокуратура Академиясининг халқаро ташкилотлар билан коррупцияга қарши курашиш бўйича ҳамкорлиги самарали давом этмоқда

2020 йилнинг 28-30 апрель кунлари АҚШ халқаро тараққиёт агентлиги (USAID) номидан фаолият юритувчи “Tetra Tech DPK” компанияси вакиллари кўмагида коррупцияга қарши курашиш соҳасида таниқли халқаро эксперт, кўп йиллар давомида Халқаро коррупцияга қарши курашиш академияси декани лавозимида ишлаган Мартин Кройтнер билан ведеоконференцалоқа режимида туркум учрашувлари ташкил этилди.

Учрашувлар давомида М.Кройтнерга Бош прокуратура Академиясининг коррупцияга қарши курашиш соҳасида амалга оширилаётган ишлар ва “Коррупцияга қарши курашиш” магистратура мутахассислиги ўқув дастурлари ҳақидаги фаолияти бўйича батафсил маълумот берилди.

Халқаро эксперт иштирокчиларни коррупцияга қарши курашиш соҳасида мутахассисларни тайёрловчи етакчи хорижий таълим муассасалари тажрибалари билан таништириб, уларнинг тажрибасига таянган ҳолда Академиянинг магистратура мутахассислиги ўқув дастурларини такомиллаштириш бўйича ўзининг дастлабки тавсияларини берди.

Шунингдек, томонлар халқаро стандартлар ва илғор хорижий тажриба асосида “Коррупцияга қарши курашиш” мутахассислиги бўйича қисқа муддат ичида янгиланган ўқув дастурларини ишлаб чиқиш ва коррупцияга қарши курашиш соҳасидаги халқаро ва хорижий экспертларни масофавий шаклда таълим жараёнига жалб қилиш масалаларини атрофлича муҳокама қилиб олишди.

Учрашувлар якунида томонлар самарали ҳамкорликни давом эттириш ҳақида келишиб олдилар.