Судьялар олий мактабида ўтказилган қўшма ўқув машғулоти

Бош прокуратура Академиясининг “Иқтисодий судларда ишларни ҳар тарафлама ва адолатли кўрилишини таъминлашда прокурорнинг роли” мавзусидаги малака ошириш курси тингловчилари ҳамда Судьялар олий мактаби тингловчилари учун жорий йилнинг 28 ноябрида Судьялар олий кенгаши ҳузуридаги Судьялар олий мактабида қўшма ўқув-семинар машғулоти ташкиллаштирилди.

Қўшма ўқув-семинар машғулоти доирасида Бош прокуратура Академияси ва Судьялар олий мактабининг профессор-ўқитувчилари, шунингдек Тошкент шаҳар ҳамда Тошкент вилояти иқтисодий судларининг судьялари иқтисодий суд йўналишида одил судловни амалга оширишда амалдаги қонунчилик нормаларига риоя қилиш масалалари юзасидан тушунтиришлар бердилар.

Давлат ва жамоат эҳтиёжлари учун ер участкаларининг олиб қўйилиши сабабли етказилган зарарни қоплаш билан боғлиқ суд низоларини ҳал қилишда қонун ҳужжатларини қўллашнинг хусусиятлари мавзусида Академия профессор-ўқитувчилари томонидан қилинган маърузада сўнгги йилларда мазкур масалада қонунчиликка киритилган янгиликлар  ҳамда уларни қўллаш юзасидан батафсил маълумот берилди.

Хусусан, Ўзбекистон Республикаси Президентининг 2019 йил 20 ноябрдаги “Мамлакатда бизнес муҳитини янада яхшилаш ва тадбиркорликни қўллаб-қувватлаш тизимини такомиллаштириш чора-тадбирлари тўғрисида”ги Қарорининг мазмун-моҳияти, ушбу Қарор билан прокуратура органлари олдига қўйилган вазифалар, жумладан хусусий мулкни ҳимоя қилиш ва мулкдорлар ҳуқуқларининг кафолатлари тўғрисидаги қонунчиликка риоя этилишини таъминлаш борасидаги талаблар тушунтириб ўтилди.

Шунингдек, Ўзбекистон Республикаси Вазирлар Маҳкамасининг 2019 йил 16 ноябрдаги 911-сон қарори билан белгиланган  жисмоний ва юридик шахсларнинг мулк ҳуқуқлари кафолатларини таъминлаш ҳамда ер участкаларини олиб қўйиш ва компенсация беришга оид янги тартиб-қоидалар ҳақида тўхталиб ўтилди.

Қўшма ўқув машғулоти давомида тингловчилар шунингдек қишлоқ хўжалиги соҳасида юзага келаётган иқтисодий низолар, жумладан контрактация шартномалари, ер ижараси шартномаларидан келиб чиқаётган низоларни ҳал қилиш бўйича шаклланган суд амалиёти юзасидан маълумотлар олдилар.

Қўшма ўқув машғулоти якуни бўйича савол-жавоблар ўтказилиб, тингловчиларни қизиқтирган масалалар юзасидан тушунтиришлар берилди.