Бош прокуратура Академияси магистратурасига кириш имтиҳонларининг якуний босқичи

2019 йил 21-23 сентябрь кунлари Бош прокуратура Академиясида магистратурага кириш имтиҳонларининг чет тили бўйича тест синови ва ҳуқуқий мавзуда эссе босқичларидан муваффақиятли ўтган номзодлар билан суҳбат бўлиб ўтмоқда.

Ўзбекистон Республикаси Бош прокуратураси Академияси магистратурасига қабул қилиш ва ўқитишни ташкил этиш тартиби тўғрисидаги низомга мувофиқ, эссе учун белгиланган максимал баллнинг 56 фоизи ва ундан ортиқ балл тўплаган номзодлар суҳбатга киритилди.

Кириш имтиҳонини ўтказишда холислик, очиқлик ва шаффофликни таъминлаш мақсадида суҳбат бўйича комиссия фаолиятига турли таълим муассасалари, жамоат ташкилотлари ва бошқа идоралар вакиллари кузатувчилар ва мутахассислар сифатида жалб этилган.

Имтиҳон билетлари автоматик тарзда электрон генерация қилиниб, суҳбат ўтказиш жараёни кириш имтиҳонларининг олдинги босқичлари сингари тўлиқ видеотасвирга олинмоқда ва Бош прокуратура Академиясининг Фейсбукдаги расмий саҳифаси орқали онлайн тарзда намойиш этилмоқда.

Суҳбат саволлари, шунингдек бўлиб ўтган кириш имтиҳонлари натижалари Бош прокуратура Академиясининг расмий веб-сайтида эълон қилинган.

Эслатиб ўтамиз, 2019 йилдан бошлаб Академияда  “Прокурорлик фаолияти”, “Тергов фаолияти” ва “Коррупцияга қарши курашиш” мутахассисликлари бўйича магистр кадрларни тайёрлаш амалга оширилмоқда.

Магистратурага танлов “Юриспруденция” йўналиши бўйича олий юридик маълумотга эга бўлган шахслар, шу жумладан прокуратура органлари ходимлари орасида ўтказилади.

2020/2021 ўқув йили учун жами 30 та қабул квотаси тасдиқланган, Академия магистратурасида таҳсил олиш учун 300 нафардан зиёд номзод ҳужжат топширган, уларнинг 70 нафари якуний босқичга ўтган.