Ички ишлар органлари ходимлари малакасини ошириш масофий курслари якунланди

Ўзбекистон Республикаси Вазирлар Маҳкамасининг 2019 йил 11 июндаги 486-сон “Тошкент шаҳрининг Чилонзор туманида ҳуқуқбузарликлар профилактикаси ва жамоат хавфсизлигини таъминлаш самарадорлигини оширишга доир қўшимча чора-тадбирлар тўғрисида”ги қарори ижросини таъминлаш мақсадида Бош прокуратура Академияси томонидан Ички ишлар вазирлиги билан ҳамкорликда 2019 йил 28 октябрдан 2 декабрга қадар Тошкент шаҳар ИИОФМБ профилактика инспекторлари учун масофавий малака ошириш курси ташкил этилди.

Масофавий малака ошириш курси доирасида 104 нафар Чилонзор тумани ИИОФМБ профилактика инспектори ишдан ажралмаган ҳолда таҳсил олди.

Курс дастури ҳуқуқбузарликлар профилактикаси хизмати фаолиятини ташкил қилиш ҳамда профилактика инспекторларининг ҳуқуқни қўллаш амалиётида мавжуд долзарб муаммоларни инобатга олган ҳолда тузилди ва асинхрон ҳамда синхрон ўқитиш режимида амалга оширилди.

Тингловчилар томонидан мазкур малака ошириш курсида ўзлаштирилган билим ва кўникмалар ҳуқуқбузарликларнинг умумий, махсус, якка тартибдаги ҳамда виктимологик профилактикасини ташкил этиш, жумладан вояга етмаганлар ўртасида назоратсизлик ва ҳуқуқбузарликларнинг олдини олиш, шунингдек ички ишлар органлари таянч пунктлари фаолиятини самарали ташкил этилишига хизмат қилади.