Иқтисодий суд ишларини юритишда прокурор иштироки мавзусида ўтказилган малака ошириш курсларининг натижалари ҳақида

Бош прокуратура Академиясида туман (шаҳар) прокурорлари ва уларга тенглаштирилган прокурорларнинг ёрдамчилари иштирокида “Иқтисодий судларда ишларни ҳар тарафлама ва адолатли кўрилишини таъминлашда прокурорнинг роли” мавзусида малака ошириш курси якунланди.

Курс доирасидаги ўқув машғулотларида тингловчиларга суд-ҳуқуқ ислоҳотлари, Иқтисодий процессуал кодексига киритилган янги нормалар, процессуал ва моддий қонун нормаларини тўғри қўллаш, муайян тоифадаги иқтисодий ишлар бўйича ягона суд амалиётини таъминлаш масалалари, иқтисодий судлов соҳасида прокуратура идоралари зиммасига юклатилган вазифалар хусусида батафсил маълумот ва тушунтиришлар берилди.

Ўқитишнинг амалий хусусияти ва прокуратура органларининг касбий фаолияти билан узвий боғлиқликни таъминлаш, шунингдек Республикада ягона суд амалиётини шакллантириш борасида судлар фаолияти билан танишиш мақсадида тингловчилар учун сайёр ўқув машғулотлари ташкиллаштирилиб, улар иқтисодий ишларни биринчи суд инстанцияларида, шунингдек апелляция ва кассация суд инстанцияларида кўрилишида иштирок этдилар.

Сайёр ўқув машғулотлари давомида олинган билимлар тингловчилар томонидан суд жараёни имитациясини ўтказиш орқали намойиш этиб берилди.

Малака ошириш курслари доирасида Академия ва Судьялар олий мактаби тингловчилари учун қўшма ўқув-семинар машғулотлари ташкиллаштирилиб, унда Академия ва Судьялар олий мактабининг профессор-ўқитувчилари, шунингдек иқтисодий судларнинг судьялари томонидан иқтисодий судлов соҳасида одил судловни амалга оширишда амалдаги қонун ҳужжатларини қўллаш хусусида тушунтиришлар берилди.

Бундан ташқари, тингловчилар томонидан мустақил ишлар бажарилди.

Ўқув курси давомида турли амалий ва спорт машғулотлари, шунингдек, маданий-маърифий тадбирлар ташкил этилди.

Малака ошириш курсларининг натижаси бўйича мустақил ишларни муваффақиятли ҳимоя қилган ҳамда синов имтиҳонларини топширган тингловчиларга белгиланган намунадаги сертификатлар топширилди.