Фуқаролик ва маъмурий суд ишларини юритишда прокурор иштироки мавзусида ўтказилган малака ошириш курсларининг натижалари ҳақида

Бош прокуратура Академиясида туман (шаҳар) прокурорлари ва уларга тенглаштирилган прокурорларнинг ёрдамчилари иштирокида “Фуқаролик ва маъмурий суд ишларини юритишда прокурор иштирокининг самарадорлигини ошириш масалалари” мавзусида малака ошириш курси тугалланди.

Ўқув курсининг асосий мақсади тингловчиларнинг билим ва кўникмаларини, тизимли таҳлил ва танқидий фикрлаш қобилиятларини ривожлантириш, фуқаролик ва маъмурий суд ишларини юритишда фуқароларнинг ҳуқуқ ва эркинликларини ҳимоя қилиш борасидаги илғор хорижий ва миллий тажрибани етказишдан иборат бўлди.

Малака ошириш курси доирасидаги ўқув машғулотларида мамлакатда амалга оширилаётган суд-ҳуқуқ ислоҳотлари, Фуқаролик процессуал кодекси ҳамда Маъмурий суд ишларини юритиш тўғрисидаги кодексининг нормаларини тўғри қўллаш, фуқаролик ва маъмурий судлов соҳасида муайян тоифадаги ишларни кўрилишида ягона суд амалиётини таъминлаш масалалари, соҳада хизмат қилаётган прокуратура ходимларининг вазифаларига алоҳида аҳамият берилди.

Ўқув машғулотларида Бош прокуратура таркибий тармоқлари ходимлари, Ўзбекистон Республикаси Олий суди, Судьялар Олий мактаби ва бошқа идоралар раҳбарлари ҳамда етук мутахассислари маърузалар билан иштирок этдилар.

Шунингдек, Академия ва Судьялар олий мактаби тингловчилари учун қўшма ўқув-семинар машғулотлари, ҳамда юқори турувчи суд инстанцияларида сайёр ўқув машғулотлари ташкиллаштирилди. Тингловчилар томонидан ўзлаштирилган билимлар ўтказилган суд жараёнларининг имитациясида намойиш этилди.

Академия томонидан ўтказилган мазкур ўқув машғулотлари тегишли бошқармаларнинг шу соҳага оид фаолиятини йўлга қўйишдаги ижобий иш тажрибалар билан алмашишга имконият яратди.

Ўқув курси давомида турли амалий ва спорт машғулотлари, шунингдек, маданий-маърифий тадбирлар ташкил этилди.

Ўқув курси якуни бўйича якуний имтиҳонлардан муваффақиятли ўтган тингловчиларга сертификатлар топширилди.