Болалар ва аёлларга нисбатан зўравонликка барҳам бериш тўғрисидаги Доҳа декларациясини амалга ошириш Глобал дастури доирасида Қорақалпоғистон Республикасида семинар-тренинг ўтказилди

Бош прокуратура Академияси ҳамда БМТ Гиёҳванд моддалар ва жиноятчиликка қарши кураш бошқармасининг Ўзбекистондаги минтақавий ваколатхонаси томонидан 2017-2019 йилларга мўлжалланган икки томонлама ҳамкорликни янада ривожлантиришнинг амалий чора-тадбирлари доирасида Нукус шаҳрида Болалар ва аёлларга нисбатан зўравонликка барҳам бериш тўғрисидаги Доҳа декларациясини амалга ошириш бўйича “Одил судловга қаратилган таълим” глобал дастурига мувофиқ икки кунлик семинар-тренинг ташкил этилди.

Тадбирда Қорақалпоғистон Республикаси ва Хоразм вилояти прокуратура органлари ходимлари, ички ишлар органларининг масъул ходимлари ва профилактика инспекторлари иштирок этишди.

Ушбу тренинг давомида иштирокчилар амалий билим ва кўникмаларга эга бўлдилар, вояга етмаганлар ўртасида ҳуқуқбузарликларнинг олдини олиш, шунингдек, болалар ва аёлларга нисбатан зўравонликка қарши кураш борасида халқаро стандартлар ва илғор хорижий тажриба билан танишдилар.

Тренинг якунида барча иштирокчиларга тегишли сертификатлар тақдим этилди.