Транспорт прокуратураси масъул ходимлари учун малака ошириш курси якунланди

Бош прокуратура Академиясида Транспорт прокуратурасининг соҳада қонунчилик ижроси устидан назоратни амалга ошириш учун масъул бўлган ходимларнинг малакасини оширишга қаратилган “Автомобиль, дарё транспорти ва йўл хўжалиги соҳаларида қонунчилик ижроси устидан назоратни ташкил этиш” мавзусидаги Ўзбекистон Республикаси Бош прокурорининг тегишли буйруғи ижроси юзасидан навбатдан ташқари ташкил этилган масофавий ўқув курси ўз ниҳоясига етди.

Мазкур малака ошириш курси дастурини ишлаб чиқишга Ўзбекистон Республикаси Транспорт вазирлиги ва унинг идоравий ташкилотлари мутахассислари жалб этилган бўлиб, унда соҳага оид долзарб мавзулар қамраб олинган.

Хусусан, ўқув машғулотлари давомида тингловчилар автомобиль ташувлари (шу жумладан халқаро ташувлар) бўйича лицензиялаш, рухсат бериш, тендерлар ташкил этиш ва ушбу фаолиятни назорат қилиш масалалари, Транспорт вазирлиги ва унинг тизимидаги ташкилотларда Маъмурий жавобгарлик тўғрисидаги кодексни қўллаш амалиёти борасида билим ва малакаларини оширдилар.

Шунингдек, йўл қурилиш ишлари сифатини назорат қилиш ва йўл хўжалигини ривожлантириш масалалари, дарё транспортини ривожлантириш соҳасидаги қонунчилик ижроси устидан назорат, умумий фойдаланишдаги ва ички хўжалик автомобиль йўлларини ҳамда транспорт инфратузилмасининг бошқа объектларини молиялаштириш, қуриш, реконструкция қилиш, таъмирлаш, сақлаш масалалари, шунингдек автовокзаллар, автостанциялар фаолияти устидан назорат масалалари атрофлича кўриб чиқилди.

Мазкур курс тингловчиларнинг ишдан ажралмаган ҳолда масофавий мустақил малака оширишига мўлжалланган.