Халқаро коррупцияга қарши курашиш кунига бағишланган туркум тадбирлар ўтказилиши

Бутун жаҳонда ҳар йили 9 декабрь Халқаро коррупцияга қарши курашиш куни нишонланиши муносабати билан Бош прокуратура Академиясида туркум тадбирларга старт берилди.

Жумладан, 9 декабрда Академиянинг Очиқ эшиклар куни ўтказилиб, унда БМТнинг Тараққиёт дастури экспертлари, Бош прокуратура, Ички ишлар вазирлиги, Олий ва ўрта махсус таълим вазирлиги, Давлат божхона қўмитасининг Божхона институти, шунингдек Жаҳон банкининг “Олий таълим муассасаларини модернизация қилиш” лойиҳаси вакиллари иштирок этди.

Иштирокчилар Ўзбекистон Республикасида коррупцияга қарши курашиш соҳасида амалга оширилаётган ислоҳотлар, халқаро стандартлар ва илғор хорижий тажрибанинг имплементация қилиниши, олий таълим ва капитал қурилиш соҳаларида амалга оширилаётган “Коррупциясиз соҳа” лойиҳалари юзасидан тасдиқланган “Йўл харита”ларининг мазмуни ва уларнинг ижроси билан таништирилди.

Шунингдек, Академия Коррупцияга қарши курашиш илмий-таълим марказининг коррупцияга қарши курашиш соҳасида прокурор-тергов ходимларини тайёрлаш ва қайта тайёрлаш, шунингдек давлат органлари ва бошқа ташкилотлар ходимларининг малакасини ошириш борасидаги фаолияти ҳақида маълумот берилди.

Очиқ эшиклар куни дастури доирасида Академиянинг “Коррупцияга қарши курашиш” йўналиши магистратура тингловчилари томонидан манфаатлар тўқнашуви ва коррупцияга оид бошқа ҳуқуқбузарлик масалалари бўйича тайёрланган қисқа муддатли видеороликлар намойиши ва муҳокамаси бўлиб ўтди.

Тадбир якунида иштирокчилар коррупцияга қарши кураш ҳафталиги доирасида Академия томонидан коррупцияга қарши курашиш мавзуларида ўтказилиши режалаштирилган махсус тадбирлар ҳақида маълум қилинди.