Замонавий таълим технологиялари борасидаги илғор хорижий тажрибани ўрганиш ва жорий этиш бўйича семинар-тренинг

2019 йил 12 декабрь куни Бош прокуратура Академиясида “Минтақавий мулоқот” ХННТнинг Ўзбекистондаги филиали кўмагида Академия профессор-ўқитувчилари учун «Ўқитишнинг интерактив методлари» мавзусида семинар-тренинг бўлиб ўтди.

Тренер сифатда юриспруденция ҳамда таълим соҳаларида катта тажрибага эга бўлган Бостон коллежи ҳуқуқ мактаби профессори Джоан Блум қатнашди.

Тадбир дастури андрогогиканинг ўзига хос хусусиятлари, касбий таълимда ўқитишнинг базавий интерактив методлари, уларни таълимнинг анъанавий ва масофавий шаклларида қўллаш самарадорлиги, шунингдек, тингловчиларда касбий кўникмаларни шакллантиришга йўналтирилган таълимни самарали ташкил этишнинг муҳим жиҳатлари каби масалаларни қамраб олди.

Шунингдек, тингловчилар эҳтиёжидан келиб чиққан ҳолда ўқув контентини шакллантириш воситалари ва методлари, ўқитувчи томонидан ўқитиш мақсадларини ва уларга эришиш усулларини белгилаш масалаларига алоҳида эътибор қаратилди.

Семинар-тренинг кейс-стади, баҳс-мунозара, кичик ва катта гуруҳларда ишлаш каби методларни ҳамда қайта алоқа технологияларини қўллаган ҳолда интерактив тарзда ўтказилди.

Академия ходимлари таълим жараёнида қўллаб келаётган ўқитишинг шакл ва методларини ҳамда тингловчилар билимини баҳолаш технологияларини хорижий эксперт билан муҳокама қилиш ва кўриб чиқиш имкониятига эга бўлдилар.