Кибержиноятчиликка қарши курашиш ва рақамли экспертизаларни ўтказиш бўйича халқаро тренинг

2019 йилнинг 9-13 декабрь кунлари Академияда «Кибержиноятчиликка қарши курашиш ва рақамли экспертизаларни ўтказиш» мавзусида Марказий Осиё мамлакатлари ҳуқуқни муҳофаза қилувчи органлари ходимлари учун халқаро тренинг ўтказилди.

Мазкур тадбир Буюк Британия Бирлашган қироллигининг жиноятчиликка қарши курашиш миллий агентлигининг Марказий Осиёдаги ваколатхонаси ҳамда Бош прокуратура Академияси ҳамкорлигида ташкил этилди.

Мазкур тадбир дастури Буюк Британия экспертлари томонидан ишлаб чиқилган, кибержиноятчилик соҳасида терговни амалга ошириш борасидаги билим касбий кўникмаларни ривожлантиришга қаратилган комплекс таълим модулидан иборат.

Тренингнинг амалий аҳамияти шундаки, у жиноят содир этилган жойни кўздан кечиришни режалаштириш, тайёргарлик кўриш ва уни ўтказишдан тортиб, то рақамли далилларни сақлаш, ҳодиса/инцидент ҳақида билдирги тайёрлаш ва кейинги тергов ҳаракатларигача бўлган тезкор таъсир кўрсатишнинг барча жиҳатларини қамраб олган.

Тренерлар сифатида халқаро экспертлар – кибержиноятларни тергов қилиш соҳасида 18 йилдан ортиқ иш тажрибасига эга бўлган Дж.Блейк ҳамда Скотланд-Ярд полициясида 15 йиллик иш стажига эга бўлган Р.Массил, шунингдек ассистент сифатида Академия ўқитувчилари иштирок этдилар.

Академия ўқитувчилари ўқув жараёнининг фаол ва объектив иштирокчилари сифатида қатнашганликлари нафақат семинарнинг умумий мақсадига эришиш ҳамда Ўзбекистонда мавжуд тергов амалиёти учун зарур курс материалларини бойитиш, балки улар учун келгусида мустақил равишда шу каби ўқув курсларини ўтказиш бўйича катта тажриба орттириш имконини берди.

Тренинг якунида иштирокчиларга сертификатлар топширилди.