Давлат солиқ хизмати органлари ходимлари учун масофавий малака ошириш курслари ўтказилмоқда

Бош прокуратура Академияси томонидан Ўзбекистон Республикаси Давлат солиқ қўмитаси ҳузуридаги Малака ошириш маркази билан ҳамкорликда ҳудудий давлат солиқ хизмати органлари ходимлари учун “Солиқ ва бошқа мажбурий тўловларни ундириш самарадорлигини ошириш масалалари” мавзусида масофавий малака ошириш курслари ташкил этилди.

Мазкур ўн кунлик масофавий ўқув курси асинхрон режимда амалга оширилади.

Масофавий малака ошириш курси дастуридан юридик шахслар томонидан солиқлар ва бошқа мажбурий тўловларни тўлаш, жисмоний шахсларнинг солиқ қарзини тўлаш мажбурияти бажарилишини таъминлаш, солиқдан қочиш схемалари ва уларни баратараф этиш йўллари, иқтисодий жиноятларнинг олдини олиш ва уларга қарши курашишни ташкил этиш масалалари ўрин олган.

Мазкур курс Давлат солиқ қўмитасининг ҳудудий солиқ тизими органлари ходимларининг юридик ва жисмоний шахслардан солиқ ва бошқа мажбурий тўловларни ундириш самарадорлигини ошириш, иқтисодий жиноятларнинг олдини олиш ва уларга қарши курашиш борасида билим ва кўникмаларини ишдан ажралмаган ҳолда мустаҳкамлашга хизмат қилади.