“Болаларга нисбатан одил судловнинг халқаро стандартлари” мавзусидаги давра суҳбати бўлиб ўтди

2019 йил 19 декабрь куни Бош прокуратура Академиясида Ўзбекистон Республикаси жиноят ва жиноят-процессуал қонунчилигини такомиллаштириш юзасидан идоралараро комиссия таркибидаги ишчи гуруҳ экспертлари ҳамда “UNICEF” халқаро ташкилотининг Ўзбекистондаги ваколатхонаси экспертлари иштирокида “Болаларга нисбатан одил судловнинг халқаро стандартлари” мавзусидаги давра суҳбати ўтказилди.

Тадбирда “UNICEF” халқаро ташкилотининг Ўзбекистондаги ваколатхонаси “Болалар ҳимояси” дастурининг раҳбари Ф.М.Лутфуллоев ҳамда мазкур дастур мутахассиси С.В.Ахаева экспертлар сифатида иштирок этдилар.

Давра суҳбатида Ўзбекистон Республикаси Олий Мажлиси Сенати, Олий суд, Судьялар Олий мактаби, Бош прокуратура, Ички ишлар вазирлиги Академияси вакиллари иштирок этдилар.

Тадбир давомида мамлакатимизда олиб борилаётган жиноят ва жиноят-процессуал қонунчилигини такомиллаштириш жараёнида вояга етмаганлар жавобгарлигини халқаро стандартларга мослаштириш масалалари муҳокама қилинди.

Экспертлар томонидан вояга етмаганлар жавобгарлигида алоҳида институт сифатида ювенал юстицияни жорий қилиш, алоҳида ҳолларда вояга етмаганларнинг жиноий жавобгарлиги масаласини судга қадар бўлган босқичда ҳал қилиш ва ижтимоий кўмаклашиш орқали жамиятга қайтаришнинг замонавий усуллари ҳақида маълумот берилди.

Ўз навбатида, миллий экспертлар иштирокчиларни жиноят ва жиноят-процессуал қонунчилигини такомиллаштириш бўйича миллий концепция билан таништириб, ижобий халқаро тажрибани амалдаги қонунчиликка ўзгартиш ва қўшимчалар киритиш жараёнида қўллаш имкониятини кўриб чиқишди.

Тадбир якунида жиноят ва жиноят-процессуал қонунчилигини такомиллаштириш юзасидан эксперт кўмаги бўйича ҳамкорлик масалалари муҳокама қилинди.