Халқаро хусусий ҳуқуқ бўйича Гаага конференцияси Бош котибининг ташрифи

Жорий йилнинг 20 декабрь куни Халқаро хусусий ҳуқуқ бўйича Гаага конференцияси Бош котиби Кристоф Бернаскони Бош прокуратура Академиясига ташриф буюрди.

Учрашув давомида иштирокчилар Гаага конференциясининг тарихи, унинг халқаро хусусий ҳуқуқ устуворлигини таминлашга қўшган ҳиссаси, глобаллашув даврида давлатлар, халқлар, шахсларнинг турли манфаатларини ҳисобга олган ҳолда оилани, болани ҳимоя қилиш учун  ҳуқуқий воситаларни жорий этиш, одил судловга эркин мурожат қилишни таъминлайдиган халқаро ташкилот сифатида унинг ваколати ва фаолиятининг аҳамияти ўсиб бораётганлиги муҳокама қилинди.

Йиғилиш якунлари бўйича иштирокчилар Гаага конвенциялари ва уларни амалга оширишнинг энг яхши амалиётларини таҳлил қилишга қаратилган илмий алоқаларни жадаллаштириш, уларни ратификация қилишга кўмаклашувчи таҳлилий материаллар тайёрлаш, стажировка ва қўшма тадбирларни ташкил этиш соҳасидаги ҳамкорликни ривожлантириш борасида ҳамфикр эканликларини билдирдилар.

К.Бернаскони Ўзбекистонда бўлиб ўтадиган парламент сайловларида халқаро кузатувчи сифатида иштирок этиш унинг учун катта шараф эканлигини таъкидлаган ҳолда мамлакатда амалга оширилаётган кенг кўламли ислоҳотлар, сайлов участкаларида ишни ташкил этиш жараёнига юқори баҳо берди.