Коррупцияга қарши курашиш соҳасида олий таълим тизими масъул ходимларини ўқитиш

Ўзбекистон Республикаси Президентининг 2018 йил 8 майдаги ПФ–5438 ва 2019 йил 27 майдаги ПФ–5729-сонли фармонларига асосан коррупцияга қарши курашиш соҳасида давлат органлари ва бошқа ташкилотлар ходимларининг малакасини ошириш Бош прокуратура Академиясининг асосий вазифаларидан бири сифатида белгиланган.

Мазкур вазифани бажариш борасида Академиянинг Коррупцияга қарши курашиш илмий-таълим маркази томонидан жорий йилнинг ўтган даври мобайнида давлат бошқаруви, ҳуқуқни муҳофаза қилиш органлари ва бошқа ташкилотлар ходимларининг коррупцияга қарши курашиш соҳасидаги малакасини ошириш мақсадида 60 дан ортиқ тадбирлар ташкил этилиб, уларда 5 мингдан ортиқ иштирокчи қамраб олинди.

Мазкур фаолият доирасида 2019 йилнинг 17-21 декабрь кунлари Академияда Олий ва ўрта махсус таълим вазирлиги ҳузуридаги Олий таълим тизими педагог ва раҳбар кадрларни қайта тайёрлаш ва уларнинг малакасини оширишни ташкил этиш бош илмий-методик маркази билан ҳамкорликда республикадаги олий таълим муассасалари бошқарув ходимлари учун “Касбий одоб-ахлоқ қоидаларига риоя этиш, манфаатлар тўқнашувини бартараф қилиш ва коррупцияга қарши курашишнинг бошқа йўналишлари” мавзусида тренерлар тайёрлаш қисқа муддатли курслари ўтказилди.

Мазкур курсларда 80 га яқин олий таълим муассасаларининг 200 нафар бошқарув ходимлари иштирокида коррупцияга қарши курашиш борасида давлат сиёсатининг устувор йўналишлари, олий таълим тизимида “Коррупциясиз соҳа” лойиҳасининг амалга оширилиш ҳолати, шунингдек, коррупцияга қарши курашишнинг бошқа йўналишлари кўриб чиқилди.

Курслар интерфаол методларни қўллаган тарзда ўтказилди.

Олий таълим тизимида коррупциявий хавф-хатарларни аниқлаш мақсадида тингловчилар ўртасида сўровномалар ўтказилди, шунингдек олган билим ва кўникмалар даражаси ва тест синовлари асосида текширилди.

Тадбир якунлари бўйича иштирокчиларга коррупцияга қарши курашиш мавзусидаги қисқа муддатли тренерлар тайёрлаш курсларини тамомлаганликлари юзасидан сертификатлар тақдим этилди.