БМТнинг Коррупцияга қарши конвенцияси иштирокчи давлатлари Конференциясининг 8-сессиясида иштирок

Бош прокуратура Академияси бошлиғи ўринбосари Ўзбекистон делегацияси таркибида БМТнинг Коррупцияга қарши конвенцияси иштирокчи давлатлари Конференциясининг 8-сессиясида иштирок этди.

Ўзбекистон делегацияси аъзолари коррупциянинг олдини олиш масаласига бағишланган Конференция ялпи мажлисидаги ўз чиқишларида мамлакатнинг ушбу йўналишда эришган ютуқлари ҳақида тўхталиб ўтишди.

Иштирокчилар эътиборига давлатимизнинг коррупцияга қарши курашиш сиёсатининг устувор йўналишлари, жумладан суд ҳокимиятининг мустақиллигини янада мустаҳкамлаш, коррупциявий ҳуқуқбузарликлар содир этилганлиги тўғрисида хабар берувчи шахсларни ҳимоя қилиш тизимини яратиш, жамиятнинг ҳуқуқий онги ва ҳуқуқий маданиятини юксалтириш орқали коррупцияга нисбатан муросасизлик муносабатини шакллантириш тўғрисидаги маълумотлар етказилди.

Халқаро ҳамкорлик ва активларни қайтариш масалаларига бағишланган кун тартиби мавзуларини кўриб чиқиш давомида Академия бошлиғи ўринбосари 2018 йил ноябрь ойида ўз фаолиятини бошлаган активларни қайтариш бўйича ARIN-WCA норасмий тармоғи ҳамда жиноят ва жиноят-процессуал қонунчилигини такомиллаштириш доирасида халқаро стандартларни имплементация қилиш бўйича амалга оширилган ишлар ҳақида маълумот бериб ўтди.

Конференция давомида “Transparency International” ХНТ Котибияти, “U4” Коррупцияга қарши кураш ресурслар маркази директори, Коррупцияга қарши кураш халқаро академияси (IACA), Базель бошқарув институти қошидаги Активларни қайтариш халқаро маркази (ICAR), Швейцария тараққиёт ва ҳамкорлик агентлиги (SDC) вакиллари ҳамда БМТнинг Гиёҳвандлик ва жиноятчиликка қарши курашиш бошқармасининг турли тармоқ ҳодимлари билаш учрашувлар ташкил этилди ва ҳамкорликнинг истиқболли йўналишлари муҳокама қилинди.