Рига олий ҳуқуқ мактабининг таълим дастурида иштирок этилди

Хорижий мамлакатларнинг ўқув ва илмий-тадқиқот муассасалари билан ҳамкорлик доирасида Ўзбекистон Республикаси Бош прокуратураси Академияси таянч докторантураси докторанти А.Давронов Рига олий ҳуқуқ мактабида Европа ҳуқуқи, иқтисодиёти ва сиёсатини ўрганиш бўйича уч ойлик таълим дастурида иштирок этди.

Дастур Латвия Республикаси ва Норвегия Ташқи ишлар вазирликлари, Нидерландия, Швеция, Швейцария ҳамда Америка Қўшма Штатлари ҳукуматлари кўмагида Рига олий ҳуқуқ мактабида амалга оширилган. Дастур Европа қўшничилик сиёсати ташаббуси билан қамраб олинган мамлакатлар ҳамда Марказий Осиё давлатлари учун мўлжалланган.

Ушбу дастур давлат хизмати, нодавлат ташкилотлар ҳамда илмий соҳа вакиллари (PhD тадқиқотчилари) учун Европа ҳуқуқи, иқтисодиёти ва сиёсати борасида сифатли халқаро академик таълим бериш мақсадига йўналтирилган.

Дастур олти асосий йўналишга бўлинган бўлиб, Европа ҳуқуқи ва интеграцияси, лойиҳа бошқаруви, миллий ривожланиш сиёсати, асосий ҳуқуқлар, Европа иқтисодий сиёсати, Европа тараққиёти ва халқаро савдо ҳуқуқи, давлат сектори лойиҳаларини бошқариш, халқаро савдо ҳуқуқи, бюджетни режалаштириш, музокаралар ўтказиш усуллари, замонавий солиқ сиёсати, соғлиқни сақлаш ва ижтимоий сиёсат каби 12 модулдан иборат.

Ҳар бир модуль якуни бўйича иштирокчиларнинг ўзлаштирган билим ва малакалари ҳамда профессор-ўқитувчиларнинг фаолияти баҳоланиб келинган.

Таълим дастури доирасида Бельгия ҳамда Люксембургга сафарлар уюштирилиб, Европа комиссияси раиси ўринбосари, Евро ва ижтимоий мулоқот бўйича Европа комиссари, шунингдек, Коррупциянинг олдини олиш ва унга қарши курашиш бюроси ва Йўл ҳаракати хавфсизлиги дирекцияси вакиллари билан учрашувлар бўлиб ўтди.

Дастур якуни бўйича тингловчиларга кириш имтиҳонларини топширмасдан туриб Рига олий ҳуқуқ мактаби магистратураси талабаси бўлиш ҳуқуқини берадиган махсус сертификатлар топширилди.

Таълим дастури натижалари бўйича Бош прокуратура Академиясида профессор-ўқитувчилар учун таянч докторантура докторанти А.Давронов иштирокида “Рига олий ҳуқуқ мактабида ўқув жараёни” мавзусида семинар ташкил этилди. Семинар дастурида касбий таълимда ўқитишнинг таянч интерактив методлари, хусусан Академия таълим жараёнига масофавий шаклини қўллаш самарадорлигини ошириш борасида фикр алмашилди.