Прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курси бошланди

Бош прокуратура Академиясида Ўзбекистон Республикаси Бош прокурорининг тегишли буйруғи билан тасдиқланган Ўзбекистон Республикаси Бош прокуратураси Академиясида прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курсига қабул қилиш танловини ўтказиш Тартибига мувофиқ, 2019-2020 ўқув йилида прокуратура органлари раҳбар кадрларини қайта тайёрлаш курсининг биринчи босқичи бошланди.

Курсга танлов уч босқичдан иборат бўлиб, биринчи босқичда номзодлар прокуратура органлари фаолияти йўналишлари ҳамда бошқарув асослари бўйича икки ойга мўлжалланган масофавий курсда ўқитилади. Курс якуни бўйича ўқитилган масофавий курс предметлари бўйича имтиҳон ўтказилиб, унинг натижаларига кўра энг юқори балл тўплаган 50 нафар номзод кейинги босқичдаги масофавий ўқишга қабул қилинади.

Иккинчи босқичда номзодлар замонавий бошқарув асослари, шунингдек прокурор-тергов фаолиятининг долзарб муаммоларини ҳал этиш борасидаги билим ва кўникмаларини, шахсий ва ишчанлик сифатларини такомиллаштиришга йўналтирилган бир ойга мўлжалланган масофавий курсда ўқитилиб, курс сўнгида якуний имтиҳон ўтказилиши назарда тутилган.

Кейинги босқичга ўтмаган, лекин минимал малакавий балларни тўплаган номзодларга малака оширганлик ҳақида сертификатлар топширилади.

Учинчи босқичда Бош прокурор буйруғи билан тасдиқланган танлов ўтказиш комиссияси томонидан номзодларнинг ўзи ишлаб турган прокуратура органи соҳавий фаолияти бўйича тайёрлаган таҳлил иши баҳоланади, шунингдек якка тартибдаги суҳбат ва ёзма имтиҳон ўтказилади.

Мазкур курсга танловни юқори даражада ташкил этиш ва ўтказиш мақсадида 2019 йил 25 декабрь куни видеоконференцалоқа орқали вебинар шаклида курснинг дастлабки босқичи бўйича масофавий ўқув машғулоти ташкил этилиб, унда қайта тайёрлаш курсига қабул қилиш танловига номзоди киритилган 250 нафардан зиёд прокуратура органлари ходимлари иштирок этдилар.

Вебинарда масофавий курснинг мақсад ва вазифалари, курсга қабул қилиш танловини ўтказиш тартиби ва босқичлари, масофадан малака ошириш жараёнини олиб боришнинг тартиб-қоидалари, техник ва технологик жиҳатлари, шунингдек, ўқув жараёни ва назорат турлари ҳақида батафсил тушунча берилди.

Қайта тайёрлаш курсининг дастури бошқарув ва менежмент асосларини ташкил этишнинг инновацион шакллари ва методларини ўзлаштиришга, прокурор-тергов ва таҳлилий ишларни юритиш, қонун ижодкорлиги фаолиятида иштирок этиш юзасидан касбий билим ҳамда кўникмаларни чуқурлаштиришга, тингловчиларнинг етакчилик фазилатларини мустаҳкамлашга йўналтирилганлиги алоҳида таъкидланди.

Вебинар давомида иштирокчиларни қизиқтирган саволларга мутахассислар томонидан тегишли жавоблар берилди.