Терроризмни молиялаштиришга қарши курашиш соҳасида миллий инструкторларни тайёрлаш бўйича ўқув курсида иштирок этилди

Академия, Бош прокуратура ҳузуридаги Иқтисодий жиноятларга қарши курашиш департаменти ва Мажбурий ижро бюроси ходимлари Вена шаҳрида (Австрия) терроризмни молиялаштиришга қарши курашиш соҳасида миллий инструкторларни тайёрлаш бўйича ташкил этилган ўқув курсларида иштирок этди.

Мазкур тадбир Ўзбекистон Республикаси вакиллари учун терроризмни молиялаштиришга қарши курашиш соҳасида миллий инструкторларни тайёрлаш бўйича ЕХҲТ ҳамда БМТнинг Наркотиклар ва жиноятчиликка қарши курашиш бўйича бошқармаси томонидан ташкил этилган ва 2019-2020 йилларда ўтказилиши режалаштирилган курсларнинг дастлабкиси ҳисобланади.

Ўқув дастурлари молиявий разведка бўлинмаси, прокуратура ва ҳуқуқни муҳофаза қилиш органлари ходимларини тайёрлаш бўйича олтита асосий курсдан, шунингдек миллий тренерларни тайёрлаш бўйича 3 та курсдан иборат.

Ўқув курси давомида таҳлилий ҳисобот тайёрлаш, ахборот манбалари ва тақдим этилган маълумотлар нуқтаи назаридан ахборотни баҳолаш, объектлар ўртасидаги ўзаро боғлиқликлар мавжудлигини кўрсатувчи матрица ва диаграммалар ясаш кўникмаларини эгаллаш билан боғлиқ амалий машғулотлар ўтказилди.

Тадбир давомида ўқув курснинг асосий афзалликлари сифатида терроризмни молиялаштиришга қарши курашиш масалалари билан боғлиқ тренер сифатида тайёргарликдан ўтган миллий экспертлар гуруҳини тузиш, мазкур йўналишда халқаро ва идоралараро ҳамкорликни мустаҳкамлаш, иш жараёнига янги замонавий тажриба ва усулларни киритиб бориш қайд этилди.

Ўзбекистон Республикаси вакилларининг мазкур курсда иштироки сермаҳсул ва фойдали бўлган бўлиб, иштирокчилар терроризмни молиялаштиришга қарши курашиш соҳасида тренинглар ўтказиш бўйича ўзларининг назарий билимларини бойитдилар.