АҚШ эксперти Г.Уэддл билан ҳамкорлик давом этмоқда

Жорий йилнинг 5 – 9 август кунлари Бош прокуратура Академиясига АҚШ ҳуқуқ соҳасидаги эксперти Грегори Уэддлнинг навбатдаги ишчи ташрифи бўлиб ўтди.

Г.Уэддл 2017-2018 йиллар давомида “Минтақавий диалог” халқаро нодавлат ташкилоти ҳамкорлигида ишлаб чиқилган Академиянинг юридик кадрларни тайёрлаш борасидаги салоҳиятини ошириш лойиҳасида четдан таклиф этилган профессор вазифасида иштирок этган.

Академия раҳбарияти билан бўлиб ўтган учрашув давомида келгусидаги ҳамкорлик масалалари, хусусан, прокуратура органлари ходимларининг малакасини ошириш ва қайта тайёрлаш соҳасидаги истиқболли лойиҳаларни ишлаб чиқиш ва амалга ошириш ҳамда юриспруденция соҳаларида қўшма тадқиқотлар ўтказиш масалалари муҳокама қилинди.

Ташриф доирасида хорижий меҳмон Академиянинг янги маъмурий биносида жойлашган мультимедиа маркази, криминалистика хоналари, суд мажлислари имитацияси зали, шунингдек, кафедра, бўлим ва марказлар фаолияти билан танишди.

Шунингдек, Г.Уэддл прокуратура органлари, бошқа ҳуқуқни мухофаза қилувчи органлар ва судлар, шунингдек, ўқув-илмий муассасалар вакилларидан ташкил топган Ўзбекистон Республикасининг жиноят ва жиноят-процессуал қонунчилигини такомиллаштириш бўйича ишчи гуруҳ йиғилишида иштирок этди. Учрашувда хорижий эксперт Ўзбекистон одил судлов тизимида замонавий механизмларни жорий этиш борасида ўз фикрлари билан ўртоқлашиб, бу борада АҚШнинг ижобий тажрибасидан фойдаланиш мумкинлигини билдирди. 

Ташриф якунига кўра, Г.Уэддл Академия билан қўшма лойиҳалар доирасида ҳамкорлик қилишга тайёр эканлигини маълум қилди.