Иқтисодий жиноятларга қарши курашиш департаментининг туман (шаҳар) бўлимлари бошлиқлари иштирокида малака ошириш курслари

Жорий йилнинг 5-17 август кунлари Бош прокуратура Академиясида Иқтисодий жиноятларга қарши курашиш департаментининг туман (шаҳар) бўлимлари бошлиқлари иштирокида малака ошириш курслари ташкил этилди.

Ўқув курси дастури асосида иқтисодий жиноятлар ва коррупцион қилмишларни фош этиш, терговга қадар текширув, суриштирув ва тезкор-қидирув фаолиятини амалга ошириш, жиноий фаолиятдан олинган даромадларни легаллаштириш, бюджет маблағларини талон-тарож қилиш, валюта ва қурилиш соҳасида содир этилаётган иқтисодий жиноятларга қарши курашиш бўйича ўқув ва амалий машғулотлар ўтказилди.

Курс давомида тингловчиларда иш фаолиятини ташкил этишда комплекс ва тизимли таҳлилни амалга ошириш, қарор қабул қилиш психологияси ва психологик барқарорликни таъминлаш бўйича тренинглар ўтказилди. Шу билан бир қаторда, раҳбар кадрларнинг бошқарувга оид компетенцияларининг ривожланганлик даражасини аниқлаш учун «ассесмент маркази» усулида баҳолаш тадбирлари ўтказилди.

Дастур доирасида Х.Сулаймонова номидаги Республика суд экспертизаси марказида сайёр машғулот ҳамда спорт ва маданий тадбирлар ташкил қилинди.

Ўқув тадбирларига Академия профессор-ўқитувчилари билан бир қаторда Бош прокуратура, Департамент, Марказий банк, Қурилиш соҳасида назорат инспекцияси, Ҳисоб палатаси, Ички ишлар вазирлиги Академияси тажрибали мутахассислари жалб қилинди.

Ўқув машғулотлари интерактив шаклда ўтказилди, тингловчилар ўз фаолиятлари билан боғлиқ долзарб масала ва муаммоларни муҳокама қилиб, уларнинг ечимига оид ўзаро тажриба алмашишди.