БОШ ПРОКУРАТУРА АКАДЕМИЯСИ МАГИСТРАТУРАСИГА КИРИШ ИМТИҲОНЛАРИ ҲАҚИДА

2019/2020 ўқув йилидан 2019/2020 ўқув йилидан бошлаб Ўзбекистон Республикаси Бош прокуратураси Академияси магистратурасига абитуриентлар қабул қилинади.

Магистратуранинг “прокурорлик фаолияти”, “тергов фаолияти” ва “коррупцияга қарши курашиш” мутахассисликлари бўйича кадрлар тайёрлаш ўқитишнинг амалий хусусиятига ва прокуратура органларининг касбий фаолияти билан узвий боғлиқликка таянган ҳолда амалга оширилади.

Академия магистратурасида таҳсил олиш учун бугунги кунда жами 310  нафар абитуриент ҳужжат топширди.

Кириш имтиҳонлари ёзма имтиҳон ва суҳбатдан ташкил топади.
Ёзма имтиҳон ҳуқуқий мавзуда эссе ва чет тили бўйича тест саволларидан иборат.

Имтиҳонни ўтказишда очиқлик ва шаффофликни таъминлаш мақсадида:

– чет тили бўйича тест саволлари Давлат тест маркази томонидан тузилиб, марказ томонидан имтиҳон ўтказилади ва жавоблари баҳоланади;

– ёзма имтиҳон Халқаро бизнес маркази биносида ўтказилади;

– ёзма имтиҳонга, имтиҳон жавобларини текширишга ва суҳбат бўйича комиссия фаолиятига бошқа идоралар вакиллари кузатувчилар ва мутахассислар сифатида жалб қилинади;

– имтиҳон билетлари автоматик тарзда электрон генерация қилинади;

– имтиҳонни олиш, унинг жавобларини текшириш ва суҳбат жараёни тўлиқ видеотасвирга олинади;

– ҳар бир номзодга идентификацион рақам берилади ва имтиҳон жавоблари тўлиқ шифрланади.

Ёзма имтиҳон ўтказиладиган вақт ва жой: чет тили ва ҳуқуқий мавзуда эссе 4 сентябрь куни соат 08.00 да Халқаро бизнес марказида (Юнусобод тумани, Амир Темур шоҳ кўчаси, 107 Б. Мўлжал: Интерконтиненталь меҳмонхонаси, “Бодомзор” метро бекати) бошланади.

Ёзма имтиҳон жараёни Бош прокуратура Академиясининг Фейсбукдаги расмий саҳифаси орқали онлайн тарзда намойиш этилади (www.facebook.com/ProsecutorAcademy).

Кириш имтиҳонларини топшириш учун номзодлар шахсини тасдиқловчи ҳужжатлар билан белгиланган вақт ва жойга келишлари лозим.

Белгиланган вақтдан кеч қолган номзодлар имтиҳонга киритилмайди, шунингдек келмаган номзодлар учун қўшимча имтиҳон ўтказилмайди ва бундай номзодларга тегишли имтиҳон учун “0” балл қўйилади.

4 сентябрь куни биринчи ярмида чет тили бўйича имтиҳон, иккинчи ярмида эса мутахассислик фанлари бўйича имтиҳон ўтказилади.

Номзодларнинг имтиҳонга кириш аниқ вақти уларга индивидуал тарзда етказилади.

Имтиҳон куни аудиторияга ўқув адабиёти, луғат, маълумотнома, жадвал, конспект, блокнот, қоғоз ёки электрон шаклдаги шпаргалкалар, норматив-ҳуқуқий ҳужжатлар, бошқа маълумот манбалари, шунингдек алоқа воситалари, аудио, фото ва видео ёзиш қурилмаларини олиб кириш ҳамда улардан фойдаланиш тақиқланиши маълум қилинади.

Чет тили бўйича ёзма имтиҳон 30 та саволдан иборат бўлиб, 3 қисмга бўлинади:

– 1-бўлим: Тинглаб тушуниш (10 та савол), ҳар бир тўғри жавоб учун 1,5 балл берилади;

– 2-бўлим: Ўқиш (10 та савол), ҳар бир тўғри жавоб учун 2 балл берилади;

– 3-бўлим: Лексик ва грамматик компетенциялар (10 та савол), ҳар бир тўғри жавоб учун 1,5 балл берилади.

Тестни бажариш учун 1 соат, жавобларни жавоб варақасига кўчириш учун 10 дақиқа, жами 1 соат 10 дақиқа вақт ажратилади.

Миллий сертификат ёки халқаро сертификатларнинг қуйидаги даражаларига эга бўлган номзодларга чет тилидан имтиҳонларсиз максимал балл берилади:

инглиз тили учун – B2 ва ундан юқори даражадаги миллий сертификат ёки International English Language Testing System (IELTS 5.5), Test of English as a Foreign Language (TOEFL IBT 72), Cambridge Assessment English FCE халқаро имтиҳон тизимлари бўйича тилни билиш даражалари B2 ва ундан юқори;

немис тили учун – B2 ва ундан юқори даражадаги миллий сертификат ёки Goethe-Zertifikat, Deutsches Sprachdiplom (DSD), Test Deutsch als Fremdsprache (Test DAF) халқаро имтиҳон тизимлари бўйича тилни билиш даражалари B2 ва ундан юқори;

француз тили учун – B2 ва ундан юқори даражадаги миллий сертификат ёки Diplôme d'Etudes en Langue Française (DELF), Тest de Connaissance du Français (TCF) халқаро имтиҳон тизимлари бўйича тилни билиш даражалари B2 ва ундан юқори;

япон тили учун – B2 ва ундан юқори даражадаги миллий сертификат ёки Japanese Language Proficiency Test (JLPT № 2) халқаро имтиҳон тизимлари бўйича тилни билиш даражалари B2 ва ундан юқори;

бошқа тиллар учун – B2 ва ундан юқори даражадаги миллий сертификат ёки халқаро имтиҳон тизимлари бўйича тилни билиш даражалари B2 ва ундан юқори.

Ёзма имтиҳонда абитуриентдан ўзига тушган ҳуқуқий мавзуда эссе ёзиш талаб этилади ва бунга 2 соат вақт ажратилади. Эссе жавоби 100 баллик тизимда баҳоланади.

Кириш имтиҳонлари билан боғлиқ барча масалалар, шу жумладан эссе мавзулари Бош прокуратура Академиясининг расмий веб-сайтида (www.proacademy.uz) эълон қилиб борилади.

Эссе натижаларига кўра 55 ва ундан юқори балл тўплаган номзодлар кириш имтиҳонларининг кейинги босқичи – суҳбатга киритилади.

Кириш имтиҳонларидан муваффақиятли ўтган номзодлар 15 сентябрга қадар Академия магистратурасига ўқишга қабул қилинади.

Кириш имтиҳонларига оид қўшимча маълумот олмоқчи бўлган номзодлар учун Бош прокуратура Академияси биносида (Миробод тумани, Шаҳрисабз кўчаси, 42. Мўлжал: Тошкентдаги Халқаро Вестминстер университети академик лицейи биноси рўпарасида) ҳар куни консультациялар ўтказилади.

Қўшимча маълумот олиш учун 71-202-04-96 (ички 1775; 1795) телефон рақамларига мурожаат қилишингиз мумкин.

Бош прокуратура Академиясининг жамоаси номзодларга кириш имтиҳонлари давомида зарур шароитларни яратиб беришга қаратилган барча чораларни кўради ва уларга омад тилаб қолади.