Бош прокуратура Академияси қабул комиссиясининг йиғилиши

2019 йил 30 август куни Бош прокуратура Академиясида 2019/2020 ўқув йили учун магистратурага ўқишга қабул қилишни ташкил этиш бўйича қабул комиссиясининг Ўзбекистон Республикаси Бош прокурори ўринбосари Э.Т.Юлдашев раислигидаги йиғилиши бўлиб ўтди.

Йиғилиш давомида яқинда Ўзбекистон Республикаси Адлия вазирлигида давлат рўйхатидан ўтган Ўзбекистон Республикаси Бош прокуратураси Академияси магистратурасига қабул қилиш ва ўқитишни ташкил этиш тартиби тўғрисидаги Низомга мувофиқ Академия тарихидаги илк маротаба магистратурага қабулни юқори даражада ташкил этиш ва ўтказиш масалалари кўриб чиқилди.

Магистратурага қабулни ўтказишда холислик, очиқлик ва шаффофликни таъминлаш чора-тадбирларига йиғилиш давомида алоҳида эътибор қаратилди. Хусусан, ёзма имтиҳон Халқаро бизнес маркази биносида ташкил этилди, ёзма имтиҳонни ўтказишга, имтиҳон жавобларини текширишга, махсус комиссия ва суҳбат бўйича комиссия фаолиятига турли таълим муассасалари, жамоат ташкилотлари ва бошқа идоралар вакиллари кузатувчилар ва мутахассислар сифатида жалб қилинди.

Чет тили бўйича тест саволларини тузиш, имтиҳонни ўтказиш ва жавобларини баҳолаш Давлат тест маркази томонидан амалга оширилади.

Имтиҳон билетлари автоматик тарзда электрон генерация қилинади, ҳар бир номзодга идентификацион рақам берилади ва имтиҳон жавоблари тўлиқ шифрланади.

Имтиҳонни олиш, унинг жавобларини текшириш ва суҳбат жараёни тўлиқ видеотасвирга олинади ва Бош прокуратура Академиясининг Фейсбукдаги расмий саҳифаси орқали онлайн тарзда намойиш этилади (www.facebook.com/ProsecutorAcademy).

Эссе мавзулари, билетлар, суҳбат саволлари, шунингдек абитуриентлар рўйхати ва уларнинг имтиҳонга кириш вақтлари Бош прокуратура Академиясининг расмий веб-сайтида эълон қилинди (http://proacademy.uz/uz/posts/0187).

Ўзбекистон Республикаси Бош прокуратураси Академияси магистратурасига қабул қилиш ва ўқитишни ташкил этиш тартиби тўғрисидаги Низомнинг 61-бандига кўра, 5.5 балл ва ундан юқори даражадаги IELTS сертификатларини тақдим этган абитуриентлар чет тили бўйича имтиҳонда иштирок этмасдан уларга бу имтиҳон учун максимал балл (50) берилади.

Академия қабул комиссияси фаолияти давом этмоқда, абитуриентлар учун Академия биносида консультациялар ўтказилмоқда.