Коррупцияга қарши тадбирлар мониторинги борасида Корея тажрибаси

2019 йил 2-5 сентябрь кунлари Коррупцияга қарши курашиш бўйича республика идоралараро комиссиясининг Эксперт гуруҳи ва унинг таркибида бўлган Бош прокуратура Академиясининг Коррупцияга қарши курашиш илмий-таълим маркази ходими Корея Республикасига қилинган ўқув сафарида иштирок этди.

Тадбир коррупцияга қарши ташаббусларни баҳолаш тажрибаси билан танишиш мақсадида БМТ Тараққиёт дастурининг Сеул маркази ва Корея Республикасининг Коррупцияга қарши курашиш ва фуқаролик ҳуқуқларини таъминлаш бўйича комиссияси (ACRC) ҳамкорлигида ташкил этилди.

Сафар давомида коррупцияга қарши курашиш бўйича идоравий чора-тадбирлар ва ташаббусларни йиллик баҳолаш, давлат хизматчилари ва фуқаролар ўртасида сўровлар ўтказиш, коррупцияга қарши рейтингларни эълон қилиш борасида ACRC амалга ошираётган фаолият юзасидан уч кунлик семинар бўлиб ўтди.

Хусусан, семинар давомида 2002 йилдан буён Коррупцияга қарши курашиш бўйича комиссия томонидан амалга ошириб келинаётган коррупцияга қарши курашиш бўйича давлат органларининг чора-тадбирлари миқдор ва сифат кўрсаткичларини баҳолаш борасидаги тажрибаси ўрганилди. Бугунги кунда замонавий ахборот-коммуникация технологияларининг кенг қўлланилиши натижасида 700 дан ортиқ барча даражадаги давлат органлари ва ташкилотлари баҳолаб келинмоқда.

Ўқув сафари давомида олинган билим ва тажриба Ўзбекистон Республикасида коррупцияга қарши курашиш мониторингини ўтказиш механизмларини янада такомиллаштиришга хизмат қилади.