Прокуратура органларида жисмоний ва юридик шахслар мурожаатлари билан ишлаш самарадорлигини ошириш

Бош прокуратура Академияси томонидан ташкил этилган “Прокуратура органларида мурожаатлар билан ишлаш фаолияти самарадорлигини ошириш” мавзусида вилоят прокуратуралари ва уларга тенглаштирилган прокуратуралар, шунингдек Бош прокуратура ҳузуридаги Мажбурий ижро бюроси ва Иқтисодий жиноятларга қарши курашиш Департаментининг мурожаатлар билан ишлаш тармоқлари ходимлари учун ташкил этилган ўқув курси ниҳоясига етди.

Мазкур ўқув курси тингловчиларда фуқароларни қабул қилиш ва мурожаатларни кўриб чиқиш жараёнини самарали ташкил этиш кўникмаларини ривожлантириш, шунингдек соҳага оид қонунчиликдаги ўзгаришлар ва ҳуқуқий ислоҳотлар борасидаги билимларини такомиллаштириш мақсадида ташкил этилган.

Ўқув машғулотларига Академия профессор-ўқитувчилари билан бир қаторда Бош прокуратуранинг тегишли таркибий тармоқлари, Ўзбекистон Республикаси Президентининг Халқ қабулхоналари, Бош вазирнинг тадбиркорлар мурожаатларини кўриб чиқиш қабулхоналари, Лойиҳа бошқаруви миллий агентлиги ҳузуридаги Бизнес ва бошқарув Республика Олий мактаби каби ташкилотларнинг ходимлари эксперт сифатида жалб этилди.

Курс дастури қонунлар ижроси устидан назорат йўналишида келиб тушаётган мурожаатлар таҳлили, жиноятчиликка қарши курашиш фаолиятида мурожаатлар билан ишлаш ҳолатини ўрганиш, судларда прокурор ваколатини таъминлаш йўналишида келиб тушаётган мурожаатлар билан ишлашнинг ўзига хос хусусиятларини кўриб чиқиш ҳамда соҳага оид бошқа долзарб масалаларни қамраб олди.

Ўқув курси доирасида Ўзбекистон Республикаси Президентининг Тошкент шаҳридаги Халқ қабулхонасида, Адлия вазирлигида, Тошкент шаҳри ва Учтепа тумани ҳокимликларида, Тошкент шаҳар Ички ишлар бош бошқармасида, Давлат хизматлари агентлигининг Тошкент шаҳар бошқармасида ва Миробод тумани бўлимида сайёр ўқув машғулотлари ташкил этилди.

Курс тингловчилари томонидан жисмоний ва юридик шахсларнинг мурожаатларини кўриб чиқишга доир фаолиятни таҳлил қилиш ҳамда бу борада мавжуд тизимли камчилик ва муаммоларни бартараф этиш бўйича аниқ таклифлардан иборат тақдимот ишлари тайёрланди.

Тингловчилар томонидан мазкур ўқув курси давомида ўзлаштирилган билим ва амалий кўникмалар прокуратура органларида мурожаатлар билан ишлаш самарадорлигини ошириш ҳамда мазкур йўналишда идоралараро ҳамкорликни янада кенгайтиришга хизмат қилиши эътироф этилди.