АҚШнинг етакчи ҳуқуқ мактабларига академик ташриф

15-23 сентябрь кунлари Бош прокуратура Академияси, Тошкент давлат юридик университети, Жаҳон иқтисодиёти ва дипломатия университети вакилларидан иборат ўзбек делегацияси Tetra Tech компанияси томонидан амалга оширилаётган USAIDнинг суд-ҳуқуқ ислоҳотлари дастури кўмагида АҚШнинг етакчи ҳуқуқ мактабларига ташриф буюрди.

Ташриф давомида ўзбек делегацияси Гастинг ҳуқуқ мактаби, Берклидаги Калифорния университети ҳуқуқ мактаби, Сан-Франциско университети, Стендфорд университети ҳамда Санта-Клара университетида бўлиб қайтди.

Иштирокчилар университетлар фаолияти, жумладан юридик клиникалар, магистратура ҳамда халқаро ҳамкорлик бўлимлари фаолиятининг ташкил этилганлиги, амалга оширилаётган академик лойиҳалар, шунингдек, замонавий университет кампусларнинг майдон ва функционал жиҳатдан ташкил этилганлиги билан танишдилар.

Ташриф дастури доирасида университетларнинг тегишли таркибий тармоқлари раҳбарлари билан учрашувлар ташкил этилиб, Берклидаги Калифорния университети ҳуқуқ мактаби ва Гастинг ҳуқуқ мактаби ўқув кампусларига ташриф буюрилди.

Шунингдек, ташриф давомида делегация Гастинг ҳуқуқ мактаби томонидан Японияда суд-ҳуқуқ соҳаси ислоҳотларига бағишлаб ташкил этилган “Японияда жиноий судловда жамоатчилик ҳамда жабрланувчилар иштироки: 10-юбилей симпозиуми” мавзусидаги симпозиумда иштирок этди.

АҚШ ҳуқуқий тизими ва жиноят ҳуқуқи соҳасидаги инновациялар билан танишиш мақсадида Сан-Франциско округи прокуратураси ҳамда Сан-Франциско Апелляция судида учрашув бўлиб ўтди.

Тадбир якунида клиник таълим соҳасини кенгайтириш, масофавий ўқитиш технологиялари ҳамда аралаш ўқитиш модулларини (Blended Learning) қўллаган ҳолда магистратура дастурларини ривожлантириш, шунингдек академик мобиллик ҳамда қўшма таълим лойиҳалари ва дастурларини такомиллаштириш борасида ҳамкорлик истиқболлари муҳокама қилинди.