Академия илмий салоҳиятини ошириш йўлида навбатдаги қадам

Жорий йилнинг 16-17 январь кунлари Бош прокуратура Академиясида профессор-ўқитувчи, докторант ва мустақил-изланувчилар иштирокида “Чет элнинг етакчи журналларида илмий мақолаларни чоп этиш талаблари” мавзусида семинар-тренинг бўлиб ўтди.

Икки кунлик тренинг Академия ходимларининг «ELSEVIER» компанияси вакиллари билан ҳамкорликда тайёрлаган методик видеоматериаллар фойдаланувида ҳамда «ELSEVIER» компаниясининг Ўзбекистон Республикасидаги координатори Санжар Атабаевнинг бевосита иштирокида ўтказилди.

Тадбирлар жараёнида Scopus, ScienceDirect ва Mendeley электрон ресурсларда рўйҳатдан ўтиш ва улардан фойдаланиш бўйича амалий машғулотлар ўтказилди.

Бундан ташқари, С.Атабаев томонидан чет элнинг етакчи илмий нашриётларида илмий мақолалар нашр қилишнинг муҳим жиҳатлари тақдимот қилинди, халқаро стандартларга асосан мақолалар тайёрлаш, таҳрир қилиш ва чоп этиш масалалари кўриб чиқилиб, мақолаларни тайёрлаш бўйича маслаҳат ва тавсиялар берилди.