Нукус мисолида шаҳар шароитида хавфсизликни бошқариш бўйича янги ташаббус

Жорий йилнинг 24 октябрида Бош прокуратура Академиясида БМТнинг Наркотик ва жиноятчилик бўйича бошқармаси Марказий Осиёдаги дастурлари халқаро менеджери Кун Маркверинг билан ишчи учрашуви бўлиб ўтди.

Учрашув давомида жамоат хавфсизлиги ва жиноятчиликнинг барвақт олдини олиш соҳасида ҳамкорлик истиқболлари муҳокама қилинди.

Жумладан, Қорақалпоғистон Республикасида олиб борилаётган тадбирларнинг самарадорлигини ошириш ва кўламини янада кенгайтириш мақсадида 2019-2020 йиллар давомида Нукус шаҳрида “Хавфсиз, инклюзив ва барқарор жамиятларда шаҳар хавфсизлигини бошқариш” синов лойиҳасини амалга ошириш бўйича томонлар фикр алмашишди.

Лойиҳа хавфнинг локал омилларини ҳар томонлама ўрганган ҳолда хавфсиз шаҳар ва уни бошқарув масалаларида стратегик ёндашувни ишлаб чиқишга йўналтирилган.

Лойиҳани амалга оширишда таълим, соғлиқни сақлаш, жамоат тартибини таъминлаш соҳаларидаги ташкилотлар, миллий ва хорижий экспертлар жалб қилиниши кўзда тутилган.

Тадбирлар режасини ва уни бажаришни мониторинг қилиш тартибини ишлаб чиқиш, хавфсиз шаҳарни бошқаришнинг баҳолаш инструментлари ва услубиётини амалиётга мослаштириш мақсадида лойиҳа доирасида семинарлар, тренинг ва давра суҳбатларини ўтказиш режалаштирилган.