Ҳуқуқий маданият тарғиботини юксалтириш йўлида

Андижон вилоятида БМТ Наркотик моддалар ва жиноятчиликка қарши кураш бошқармасининг «Ҳаётга қўшил» (Line Up Live UP) дастури бўйича мактаб ўқувчилари ўртасида гиёҳванд моддаларни истеъмол қилиш, зўравонлик ва ҳуқуқбузарликнинг олдини олиш, спорт орқали ҳаётий кўникмаларни шакллантиришга қаратилган тренинг машғулотлари ўтказилди.

Тадбир очилиши маросимида Халқ таълими вазирлиги, Бош прокуратура Академияси ва БМТ Наркотик моддалар ва жиноятчиликка қарши кураш бошқармаси Марказий Осиёдаги минтақавий идораси вакиллари иштирок этишди.

Маълумот учун: «Ҳаётга қўшил» ташаббуси Доха декларациясининг глобал амалга ошириш дастури: ҳуқуқий маданиятни тарғиб қилиш юзасидан 2015 йилда Жиноятларнинг олдини олиш ва судлов бўйича 13-Конгрессида маъқулланган. Бош прокуратура Академияси ҳуқуқбузарликлар профилактикаси соҳасида қўйилган вазифаларни бажариш мақсадида БМТнинг НМваЖҚКБ билан биргаликда турли дастурларни амалга оширишда фаол иштирок этиб келмоқда.

Уч кунлик тренингда Андижон, Наманган ва Фарғона вилоятларидаги мактабларнинг 30 га яқин психолог, маънавият ишлари бўйича ходимлар ва жисмоний тарбия ўқитувчилари қатнашди.

Тренинг давомида иштирокчилар нафақат махсус жисмоний машқ ва жамоавий ўйинларни ўтказиш, балки мактаб ўқувчиларида жамият ҳаёти қадриятларига ҳурмат, қоидалар ва меъёрларга риоя қилиш, тенгдошларга нисбатан бағрикенглик, ўз ҳис-туйғуларини назорат қилиш ҳамда ноқонуний хатти-ҳаракатлар содир этишни ундовчиларга «йўқ» дейишни ўргатиш қобилиятини ўрганди.