Ҳуқуқбузарликлар профилактикаси юзасидан Қорақалпоғистон Республикасига навбатдаги ташриф

Жорий йилнинг 26 октябрида Бош прокуратура Академияси ходимлари ички ишлар ва прокуратура органлари фаолиятининг самарадорлиги масалалари, шу жумладан, жиноятчиликнинг барвақт олдини олиш, унга қарши курашиш ва жамоат хавфсизлигини таъминлаш борасида амалий ёрдам бериш учун Қорақалпоғистон Республикасига навбатдаги ташрифни амалга оширишди.

Тадбирлар Ўзбекистон Республикаси Соғлиқни сақлаш вазирлиги ҳамда Ўзбекистон тиббий-илмий фаолият билан шуғулланувчилар “Табобат” Академияси билан хамкорликда ташкил этилди.

Учрашув давомида ўзини ўзи бошқариш органлари ва жамоат ташкилотларини ахборот технологияларини кенг қўллаган ҳолда жалб этиш ва эксперт-таҳлил гуруҳларининг фаолиятини ташкиллаштириш масалалари ўрганиб чиқилди. Ҳар бир туман миқёсида алоҳида қонунбузарлик ва жиноятчилик турлари ҳамда уларнинг содир этилиши асосий сабаблари таҳлил қилинди.

Шунингдек, учрашувда фуқаролар томонидан тиббиёт соҳаси ходимларига нисбатан ғайриқонуний ҳаракатлар содир этилишининг олдини олиш долзарб масалалардан бири эканлиги таъкидланди. Ушбу муаммони бартараф этиш учун нафақат давлат органлари, балки тиббиёт ходимларининг ҳуқуқларини ҳимоя қилишга ихтисослашган жамоат ташкилотлари имкониятларидан ҳам кенг фойдаланиш лозимлигига эътибор қаратилди.