Академияда “Экстремизмга қарши курашишда ҳуқуқни муҳофаза қилувчи органларнинг роли” мавзусига бағишланган вебинар ўтказилди

Жорий йилнинг 12 ноябрь куни Ўзбекистон Республикаси Бош прокуратураси Академиясида экстремизмга қарши курашишда ҳуқуқни муҳофаза қилувчи органларнинг ролига бағишланган республика ўқув-семинари ташкил этилди.

Видеоконференцалоқа режимида ўтказилган семинарда Бош прокуратура, Иқтисодий жиноятларга қарши курашиш департаменти, Қорақалпоғистон Республикаси, Тошкент шаҳар, вилоятлар, Ўзбекистон Транспорт ва Ҳарбий прокуратуралари ходимлари, шунингдек Бош прокуратура Академияси профессор-ўқитувчилари ва тингловчилари иштирок этдилар.

Тадбирни ўтказишга  Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитаси, Иқтисодий жиноятларга қарши курашиш Департаментининг Терроризмни молиялаштиришга қарши курашиш бўлими, Бош прокуратуранинг Ички ишлар органларида қонунчилик ижроси устидан назорат бошқармаси таркибидаги ахборот-таҳлил бўлими ҳамда Қуролли кучлар ва давлат хавфсизлик хизмати органларида қонунчилик ижроси устидан назорат бошқармаси масъул ходимлари маърузачи сифатида жалб этилдилар.

Тадбирда иштирокчиларнинг асосий эътибори диний мазмундаги маҳсулотларни Ўзбекистонга олиб кириш, тайёрлаш ва тарқатиш, экстремизмни молиялаштиришга қарши курашиш чоралари, интернетдаги экстремизмга оид хавф-хатарлар масалаларига қаратилди.

Семинар қизғин баҳс-мунозара руҳида ўтказилиб, иштирокчилар ўзларини қизиқтирган саволларга жавоб олдилар.