Фуқаролар сайлов ҳуқуқларининг кафолатларига бағишланган конференция бўлиб ўтди

2019 йил 8 ноябрь куни Ўзбекистон Республикаси Бош прокуратураси Академияси ва Бердақ номидаги Қорақалпоғистон давлат университети ҳамкорликда жорий йилнинг 22 декабрида Ўзбекистон Республикаси Олий Мажлиси, халқ депутатлари вилоят, туман ва шаҳар Кенгашларига бўлиб ўтадиган сайловларга бағишланган “Фуқароларнинг сайлов ҳуқуқларининг кафолатлари” мавзусида конференция ўтказилди.

Конференцияда Бош прокуратура Академияси ходимлари, Ўзбекистон Халқ демократик партияси, “Миллий тикланиш” демократик партияси, “Адолат” социал-демократик партияси, Тадбиркорлар ва ишбилармонлар ҳаракати – Ўзбекистон Либерал-демократик партияси, Ўзбекистон Экологик партияси аъзолари ҳамда Бердақ номидаги Қорақалпоғистон давлат университетининг профессор-ўқитувчилари иштирок этдилар.

Конференция давомида жорий йилда вакиллик органларига бўлиб ўтадиган сайловлар юзасидан қатор мавзуларда, жумладан, “Демократик давлатда сайловларнинг ўрни”, “Сайлов қонунчилигини такомиллаштиришнинг асосий йўналишлари”, “Халқаро сайлов стандартлари ва уларнинг миллий қонунчиликдаги ижроси” каби мавзуларда чиқишлар қилинди.

Конференция иштирокчилари ўзларини қизиқтирган саволларга жавоблар олдилар.