Ўзбекистон Республикаси Жиноят-ижроия қонунчилигини такомиллаштириш масалалари

Жорий йилнинг 19-22 ноябрь кунлари Жиноят-ижроия қонунчилигини такомиллаштириш бўйича Идоралараро эксперт гуруҳи томонидан Бош прокуратура Академияси билан ҳамкорликда ҳамда БМТнинг Наркотик моддалар ва жиноят бошқармаси кўмагида хорижий экспертлар иштирокида “Жиноят-ижроия қонунчилиги ҳамда пенитенциар тизимни ислоҳ қилишда халқаро стандартлар” мавзусида семинар-тренинг ташкил этилди.

Тадбирда Бош прокуратура, Олий суд, Ички ишлар вазирлиги ходимлари шунингдек, Бош прокуратура Академияси, Судьялар олий кенгаши ҳузуридаги Судьялар олий мактаби, Ички ишлар вазирлиги Академияси, Тошкент давлат юридик университети вакиллари иштирок этишди.

Семинар-тренинг давомида пенитенциар тизими соҳасидаги халқаро стандартлар ва нормаларни инобатга олган ҳолда Ўзбекистон Республикаси жиноят-ижроия қонунчилигини такомиллаштириш ҳамда озодликдан маҳрум қилиш билан боғлиқ бўлмаган жазоларни ижро этиш механизмларини тубдан қайта кўриб чиқиш масалалари муҳокама этилди.

Бундан ташқари, хорижий экспертлар Ф.Мейснер, М.Гета, Н.Радковска ва И.Дурнескулар ўз маърузаларида Европа Иттифоқи мамлакатларидаги пенитенциар муассасалар фаолиятининг ижобий тажрибаси, шунингдек маҳкумларни келажакда иш билан таъминлаш ва уларни ресоциализация қилишга доир дастурларнинг ўзига хос хусусиятлари ҳамда ушбу соҳадаги пробация хизматининг илғор амалиётига доир масалалар ёритишди.       

Иштирокчилар томонидан умумэътироф этилган халқаро стандартларга мувофиқ маҳкумларнинг ҳуқуқлари доирасини янада кенгайтириш ва жазони ижро этиш муассасалари фаолияти устидан жамоатчилик назоратини кучайтириш, уларнинг озодликдан маҳрум этиш жойларидан озод этилган шахсларни ижтимоий мослаштиришда фуқаролик жамияти институтлари билан узвий ҳамкорлигини таъминлаш жиноий жазоларнинг ижроси соҳасидаги норматив-ҳуқуқий базани янада такомиллаштиришнинг устувор йўналишларидан ҳисобланиши таъкидланди.