Прокуратура органларининг жисмоний ва юридик шахслар мурожаатлари билан ишлаш фаолиятини такомиллаштириш истиқболлари

Жорий йилнинг 27 ноябрь куни Бош прокуратура Академиясида вилоятлар прокуратуралари ва уларга тенглаштирилган прокуратуралар, Бош прокуратура ҳузуридаги Мажбурий ижро бюроси ва Департамент ходимлари учун «Прокуратура органларида мурожаатлар билан ишлаш фаолияти самарадорлигини янада ошириш истиқболлари» мавзусида вебинар ўтказилди.

Вебинар ходимларда мурожаатларни қабул қилиш ва кўриб чиқиш, жисмоний шахслар ва юридик шахслар вакилларини қабул қилишни ташкил қилиш кўникмаларини ривожлантириш, шунингдек, мавжуд тизимли муаммоларни муҳокама қилиш ва уларни самарали ҳал қилиш бўйича таклифлар ишлаб чиқиш мақсадида ташкил этилди.

Тадбирнинг амалий аҳамиятини таъминлаш мақсадида, унга Ўзбекистон Республикаси Президенти Администрацияси, Адлия вазирлиги ҳузуридаги Давлат хизматлари агентлиги вакиллари, Бош прокуратуранинг ижтимоий ва иқтисодий қонунчилик ижроси устидан назорат, мурожаатлар билан ишлаш тармоқлари ходимлари, шунингдек, Академиянинг профессор-ўқитувчилари ва магистратура курслари тингловчилари жалб этилди.

Вебинарда «Мурожаатларни кўриб чиқишда прокуратура органлари ва Президент Халқ қабулхоналарининг ҳамкорлиги», «Прокуратура органларининг мурожаатлар билан ишлаш фаолияти самарадорлигини янада ошириш масалалари», «Прокуратура органлари ходимларининг мурожаатлар билан ишлаш бўйича касбий қайта тайёрлаш ва малакасини ошириш масалалари», «Мурожаатларни кўриб чиқишда йўл қўйилаётган камчиликларни самарали бартараф этиш» ва «Жисмоний шахслар ва юридик шахслар вакиллари қабулини ўтказишнинг психологик жиҳатлари» каби долзарб мавзулар бўйича маърузалар тингланди.

Тадбир якунида иштирокчилар томонидан прокуратура органларининг фуқаролар мурожаатлари билан ишлаш фаолияти самарадорлигини ошириш, мавжуд тизимли камчиликларни бартараф этиш бўйича амалий таклифлар ва қуйи прокуратураларнинг тегишли тармоқлари ишини тўғри ташкил этиш юзасидан тавсиялар ишлаб чиқилди.