Академия магистратураси тингловчилари учун Миллий кинология марказида сайёр ўқув машғулоти

Бош прокуратура Академияси магистратура тингловчиларининг касбий билим ва кўникмаларини такомиллаштириш мақсадида давлат ва жамоат ташкилотларида мунтазам сайёр ўқув машғулотлари ташкил этилмоқда.

Жорий йилнинг 28 ноябрь куни Ўзбекистон Республикаси Давлат божхона қўмитаси Миллий кинология марказида навбатдаги сайёр ўқув машғулоти ўтказилди.

Машғулот давомида тингловчиларга Миллий кинология маркази тарихи, унинг асосий фаолият йўналишлари, минтақавий мақоми, амалга оширилаётган ишлар ҳақида қисқача маълумот берилиб, Марказ фаолиятига оид видеолавҳа намойиш қилинди.

Шунингдек, тингловчилар Марказ ҳудудидаги бино ва иншоотлар, ўқув-имитация заллари ва машғулот майдонлари, хизмат итлари учун яратилган шароитлар билан яқиндан танишишди.

Марказнинг малакали кинологлари томонидан хизмат итлари ёрдамида гиёҳвандлик воситалари, қурол-яроғ, ўқ-дори, портловчи моддалар, валюта қимматликлари ва тамаки маҳсулотларини қидириб топиш, шунингдек, ҳимоя-қоровул, террорчиликка қарши операцияларда иштирок этиш йўналишлари бўйича кўргазмали чиқишлар амалга оширилди.

Мазкур амалий машғулот тингловчиларда катта таассурот қолдириб, жиноятчиликка қарши курашишда хизмат итларидан фойдаланиш борасида билим ва кўникмалар шакллантиришга хизмат қилди.