Бош прокуратура Академияси тингловчиларининг Тошкент туманлараро иқтисодий судидаги сайёр машғулоти

Ўзбекистон Республикаси Бош прокуратурасининг Академияси томонидан ўқитишнинг амалий хусусияти ва прокуратура органларининг касбий фаолияти билан узвий боғлиқликни таъминлаш мақсадида “Иқтисодий судларда ишларни ҳар тарафлама ва адолатли кўрилишини таъминлашда прокурорнинг роли” мавзусида ташкиллаштирилган малака ошириш ўқув курсининг тингловчилари учун жорий йилнинг 26 ноябрида Тошкент туманлараро иқтисодий судида сайёр машғулот ташкиллаштирилди.

Ушбу машғулот давомида тингловчилар биринчи инстанция судида конкрет тоифадаги иқтисодий ишлар бўйича ўтказилган суд жараёнларида иштирок этдилар.

Жумладан, тингловчилар ноқонуний қурилмаларни мажбурий тартибда бузиш, пудрат шартномаларидан келиб чиққан низолар, мажбуриятларни бажармаганлик ёки лозим даражада бажармаганлик низолари, мулкка эгалик ҳуқуқини белгилаш билан боғлиқ иқтисодий ишлар бўйича ўтказилган суд мажлисларида қатнашдилар.

Ушбу иқтисодий ишларнинг кўрилишида суд залида ҳозир бўлган тингловчилар биринчи инстанция судида прокурорнинг иштироки, унинг кўрилган иш доирасидаги позицияси, ишнинг кўрилиши натижалари бўйича прокурор фикрида акс эттириладиган масалалар, қайд этилган тоифадаги иқтисодий ишлар бўйича суд амалиёти билан яқиндан танишдилар.

Шунингдек, сайёр машғулот давомида тингловчиларга республикамизда фаолият юритаётган иқтисодий судларнинг тизими, суд амалиётида учраётган муаммолар ва уларнинг ечими ҳамда суд жараёнларини ўтказишда видеоконференцалоқа тизимидан фойдаланиш имкониятлари хусусида тушунтиришлар берилди.

Сайёр машғулот якуни бўйича Академиянинг судларда прокурор ваколатини таъминлаш кафедраси ўқитувчилари ва тингловчилари суд-прокурор амалиётидаги бир қатор масалалар бўйича фикр алмашдилар ҳамда қонун ҳужжатларини тўғри ва бир хилда қўллаш юзасидан тегишли тушунтиришлар, тавсиялар берилди.

 Жорий йилнинг 27 ноябрида Академиянинг суд зали ўқув-имитация хонасида тингловчилар томонидан иқтисодий суд процессининг имитацияси ўтказилди.

Тингловчиларнинг бир гуруҳи томонидан намойиш этиб берилган суд имитацияси жараёни эксперт сифатида суд залида иштирок этаётган бошқа гуруҳ тингловчилари томонидан таҳлил қилиб берилди.

Ўз навбатида малака ошириш курси барча тингловчиларининг конкрет иш доирасида процессуал ва моддий қонунчилик нормаларини қўллай олиш  бўйича билим ва кўникмалари синовдан ўтказилди.

Имитация суд жараёни якуни бўйича савол-жавоблар ўтказилиб, тингловчиларни қизиқтирган масалалар юзасидан тушунтиришлар берилди.