Бир ҳафталик сайёр ўқув ва амалий машғулотлар якунланди

Ички ишлар вазирлиги Академияси кўмагида Бош прокуратура Академияси магистратураси ўқув режаси доирасида тингловчилар учун ташкил этилган дала ўқув ва амалий машғулотлар якунланди.

Дала шароитида ўтказилган сайёр ўқув машғулотлари доирасида тингловчилар жанговор, саф ва жисмоний тайёргарликнинг асосларини ўзлаштирдилар, шу билан бирга дастурнинг тегишли ўқув фанлари бўйича дарс жараёнларини давом эттирдилар.

Хусусан, ҳақиқий шароитга яқинлаштирилган ҳолда тергов ҳаракатлари имитацияси амалга оширилиб, бу тажрибали устозлар раҳбарлигида тингловчиларнинг криминалистика соҳасидаги касбий кўникмаларини мустаҳкамлашга имкон яратди.

Бундан ташқари, ҳуқуқбузарликлар профилактикаси инспекторлари иштирокида соҳавий фаолиятнинг долзарб масалалари бўйича тренинг машғулотлари ўтказилди.

Шунингдек, тингловчилар жанговар ўқотар қуролларнинг асосий турлари, улардан фойдаланишнинг назарий жиҳатлари билан яқиндан танишдилар ва ўқ отиш машғулотларида қатнашиб, яхши натижаларни намойиш этдилар.

Тингловчилар ўқишдан бўш вақтларида ўзларининг билимларини ошириш ва жисмонан чиниқиш мақсадида Ички ишлар вазирлиги Академиясининг ахборот-ресурс маркази ва спорт-соғломлаштириш мажмуаси имкониятларидан самарали фойдаландилар.

Ички ишлар вазирлиги Академиясининг дала ўқув майдони базасида ўқув машғулотларини ўтказиш бўйича икки йиллик тажбира талабалар ўзаро муносабатлари ва жамоавий жипсликни мустаҳкамлаш, шунингдек улар ўртасида тажриба алмашишда ўз самарасини кўрсатди.