Академия ҳамда Олий ва ўрта махсус таълим вазирлиги ўртасидаги ҳамкорликни мустаҳкамлаш масалалари муҳокама қилинди

Жорий йилнинг 30 май куни Ўзбекистон Республикаси Бош прокуратураси Академияси бошлиғи Е.В.Коленко ҳамда Олий ва ўрта махсус таълим вазири ўринбосари У.Ш.Бегимкулов ўртасида учрашув бўлиб ўтди.

Шунингдек, учрашувда Академия ва вазирликнинг масъул ходимлари иштирок этдилар.

Мазкур учрашув ўқув жараёнини самарали ташкил этиш, фундаментал, амалий ва инновацион тадқиқотларни амалга ошириш, семинар, конференция ва бошқа тадбирларни ҳамкорликда ташкил этиш йўналишларида мустаҳкам ҳамкорлик муносабатларини ўрнатиш мақсадида ташкил этилди.

Вазирлик вакиллари Академиянинг илғор таълим ва ахборот-коммуникация технологиялари, амалиётга йўналтирилган компетенциявий ёндашув, интерактив ва муаммоли методлар асосида, ўқитишнинг масофавий шаклларини жорий этган ҳолда ўқув жараёнини ташкил этиш борасидаги тажрибаси билан яқиндан танишдилар.

Бундан ташқари томонлар Академия ҳамда Вазирлик тизимидаги олий ўқув юртлари ўртасидаги ҳамкорликни ривожлантириш масалаларини муҳокама қилдилар.

Академия ҳамда Вазирлик ўртасидаги ўзаро ҳамкорликни ривожлантириш бўйича амалий чора-тадбирлар дастури лойиҳаси муҳокама қилиниб, бу учрашувнинг амалий аҳамияти ва натижадорлигини янада оширди.

Ўтказилган учрашув вазирлик ва унинг тизимидаги олий таълим муассасалари билан Академия ўртасидаги доимий алоқаларни янада юксак поғоналарга олиб чиқишга хизмат қилади.