Академия ходимлари Японияда малака оширишмоқда

Ўзбекистон Республикаси Бош прокуратураси Академияси ҳамда Транспорт прокуратураси ходимлари Япония халқаро ҳамкорлик ташкилоти (JICA) томонидан Япониянинг Кобе шаҳрида жорий йилнинг 20 январидан 31 январига қадар ўтказилиши режалаштирилган “Йўл ҳаракати хавфсизлиги” мавзусида ташкиллаштирилган халқаро ўқув курсида иштирок этишмоқда.

Ўқув курси дастурида Япониянинг йўл ҳаракати хавфсизлигини таъминлаш тизими, унинг шаклланиш тарихи, шунингдек мазкур соҳани ҳуқуқий тартибга солиш, йўл ҳаракати хавфсизлиги иштирокчиларини ўқитиш ва уларнинг малакасини ошириш, йўл ҳаракати хавфсизлигини таъминлаш бўйича бутун жараённи бошқариш масалаларини ўрганиш назарда тутилган.

Шу билан бир қаторда, ўқув курси давомида семинарда иштирок этаётган Малайзия, Камбоджа, Тайланд ва бошқа давлатларнинг йўл ҳаракати хавфсизлиги соҳасида тажрибаларини ўрганиш асосида мамлакатимизда йўл ҳаракати хавфсизлигини таъминлаш амалиётига ижобий хорижий амалиётларни жорий этишга оид таклифлар ишлаб чиқиш имконияти мавжуд.