Академия ҳамда Миллий гвардия Ҳарбий-техник институти ўртасидаги ҳамкорликни ривожлантириш масалалари муҳокама қилинди

2020 йил 5 июнь куни Бош прокуратура Академиясида Академия бошлиғи Е.В.Коленко ҳамда Ўзбекистон Республикаси Миллий гвардияси қўмондонининг ўринбосари С.Д.Мамаюсупов, Миллий гвардия Ҳарбий-техник институти бошлиғи М.Х.Рустамбаев ва Миллий гвардиянинг Ихтисослаштирилган ўқув маркази бошлиғи Х.В.Дадабаев ўртасида учрашув бўлиб ўтди.

Мазкур учрашув ҳуқуқни муҳофаза қилиш органлари кадрларини тайёрлаш, қайта тайёрлаш ва малакасини ошириш соҳасида икки томонлама ҳамкорликни ривожлантириш масалаларини муҳокама қилиш мақсадида ташкил этилди.

Иштирокчилар Академиянинг илғор таълим ва ахборот-коммуникация технологиялари, амалиётга йўналтирилган компетенциявий ёндашув, интерактив ва муаммоли методлар асосида ўқув жараёнини ташкил этиш борасидаги тажрибаси билан танишдилар.

Академиянинг ўз электрон платформаси негизида фаолият юритаётган ва коронавирус пандемияси шароитида алоҳида долзарблик касб этган электрон (масофавий) таълимни тизимли жорий этиш имконини берган «ProAcademy» ахборот-таълим портали меҳмонларда қизиқиш уйғотди.

Томонлар шунингдек Академия ва Институтнинг суд ва ҳуқуқни муҳофаза қилиш соҳаларида илмий тадқиқотларни амалга ошириш ва натижаларини амалиётга тадбиқ этишни таъминлашга йўналтирилган Илмий-тадқиқот консорциуми доирасида амалга ошираётган ҳамкорлиги масалаларини муҳокама қилишди.

Бўлиб ўтган учрашув замонавий стандартлар ва талабларга жавоб берадиган ҳуқуқни муҳофаза қилиш органлари ходимларини тайёрлаш соҳасида Академия ва Институт ўртасидаги ҳамкорликни янада ривожлантиришга хизмат қилади.