Академия профессор-ўқитувчиларининг касбий маҳоратини ошириш бўйича навбатдаги вебинар

Академияда мунтазам равишда таълим жараёни самардорлигини ошириш мақсадида профессор-ўқитувчиларнинг касбий маҳоратини такомиллаштириш ва ўқув жараёнига илғор таълим технологияларини жорий этишга қаратилган семинарлар ташкил этиб келинмоқда.

Тошкент давлат педагогика университети билан ҳамкорликда ташкил этилган “Андрагогик таълим технологиялари ва педагогнинг касбий компетенциялари” мавзусидаги навбатдаги вебинар Академияда 2020 йил 5 июнь куни бўлиб ўтди.

Вебинарни Тошкент давлат педагогика университети декани, педагогика фанлари доктори М.Т.Мирсолиева олиб борди.

Вебинар жараёнида катталар таълимининг ўзига хос хусусиятлари, мақсад ва вазифалари, андрагогик таълим технологиялари ва моделлари, тингловчилар билан ишлашда лозим бўлган компетенциялар, педагогнинг касбий компетентлилиги ва унинг таркибий қисмлари, кейс тузиш ва ундан ўқув жараёнида фойдаланиш қоидалари, шунингдек катталар таълимини самарали ташкил этишнинг бошқа жиҳатлари муҳокама қилинди.

Интерактив тарзда ўтказилган тадбир Академия профессор-ўқитувчиларининг андрагогик кўникма ва компетенцияларини такомиллаштиришга хизмат қилди.

Академия томонидан мазкур мавзу доирасида етакчи экспертларни жалб қилган ҳолда туркум семинарлар ўтказилиши режалаштирилган.