“Пандемия шароитида чет тилларини масофавий ўқитиш” мавзусида халқаро илмий-амалий конференция

2020 йил 16 июнь куни Ўзбекистон Республикаси Бош прокуратураси Академияси томонидан Ўзбекистон давлат жаҳон тиллари университети ҳузуридаги Чет тилларни ўқитишнинг инновацион методикаларини ривожлантириш Республика илмий-амалий маркази (РИАИМ) билан ҳамкорликда “Пандемия шароитида чет тилларини масофавий ўқитиш” мавзусида халқаро илмий-амалий онлайн-конференция ташкил этилди.

Тадбирда Ўзбекистон нофилологик олий таълим муассасалари инглиз тили ўқитувчиларининг ўзаро тажриба алмашиш гуруҳи (UzTESPING) аъзолари, шунингдек Лейчестер университети, Варвик университети (Буюк Британия), Дублин Сити университети (Ирландия), Синодал мактаби (Бразилия) ҳамда Тошкентдаги Вестминистер халқаро университети экспертлари иштирок этдилар.

Тадбир давомида иштирокчилар пандемия шароитида инглиз тилини ўқитишни ташкил этишнинг долзарб масалалари, соҳадаги тизимли муаммоларни муҳокама қилиб, уларнинг ечимларига оид фикр алмашдилар.

Иштирокчилар Бош прокуратура Академиясида чет тилларини ўқитиш борасидаги тажриба, таълим жараёнида қўлланилаётган замонавий методикалар билан танишдилар.

Онлайн конференция масофавий таълим истиқболларига ҳамда таълим сифатини таъминлашниниг устувор вазифаларига оид фикр ва тажриба алмашиш учун қулай имконият бўлиб хизмат қилди.

Конференция интерактив ва ишчан руҳда ўтказилиб, якунлари бўйича иштирокчилар томонидан келажакда муҳокама қилинадиган муҳим масалалар белгилаб олинди, шунингдек UzTESPING доирасида алоқаларни янада мустаҳкамлашга тайёр эканликлари билдирилди.