Таълим муассаларини аттестациядан ўтказиш масалалари муҳокама қилинди

Бош прокуратура Академияси томонидан Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси билан ҳамкорликда “Кадрлар малакасини ошириш ва уларни қайта тайёрлаш таълим ташкилотларини аттестациядан ўтказиш: талаб ва шартлар” мавзусида вебинар бўлиб ўтди.

Мазкур вебинар кадрлар малакасини ошириш ва уларни қайта тайёрлаш таълим ташкилотларини аттестациядан ўтказишда муҳим бўлган омил ва мезонларни муҳокама қилиш мақсадида ташкил этилди.

Вебинарда Таълим сифатини назорат қилиш давлат инспекцияси бўлим бошлиғи Б.Ф.Назаров қатнашиб, Ўзбекистон Республикаси Вазирлар Маҳкамасининг 2019 йил 7 июндаги 470-сонли қарори билан тасдиқланган “Давлат таълим муассасалари ҳамда нодавлат таълим ташкилотларини аттестациядан ва давлат аккредитациясидан ўтказиш тартиби тўғрисида”ги низом талаблари билан иштирокчиларни таништириб ўтди.

Жумладан, таълим муссасалари томонидан кадрлар малакасини ошириш ва уларни қайта тайёрлаш жараёнини сифатли ва давлат таълим стандартлари даражасида  ташкил этишнинг долзарб масалалари муҳокама қилинди.

Шунингдек, юридик кадрларни тайёрлаш, қайта тайёрлаш ва уларнинг малакасини оширишни амалга оширувчи таълим ташкилотларини аккредитациядан ўтказишнинг ўзига хос жиҳатларига ҳам тўхталиб ўтилди.

Тадбирда таълим муассасаларини аттестациядан ўтказиш учун уларни ички ва ташқи баҳолаш, жумладан Академияда таълим жараёни ҳамда профессор-ўқитувчилар фаолиятини давлат таълим стандартлари талабларига мос равишда ташкил этишнинг асосий талаблари ҳақида батафсил тушунтириш берилди.

Ўтказилган тадбир Академиянинг ўқув-илмий фаолияти сифатини янада оширишга хизмат қилади.