Академия томонидан республика вебинари ташкил этилди

Ўзбекистон Республикаси Бош прокуратураси Академиясида “Фирибгарлик жиноятлари, Жиноят процессуал кодексининг 416, 417-моддаларининг қўлланилишида тергов-суд амалиётидаги муаммолар” мавзусида республика вебинари ўтказилди.

Вебинарда Бош прокуратура ходимлари, Ўзбекистон Республикаси Олий суди жиноят ишлари бўйича судлов ҳайъатининг судьялари,  Ўзбекистон Республикаси Судьялар олий кенгаши ҳузуридаги Судьялар олий мактабининг вакиллари, ИИВ ҳузуридаги Тергов департаменти раҳбарияти, Бош прокуратура Академиясининг профессор-ўқитувчилари, шунингдек жойлардаги прокуратура органларининг соҳа бўйича ходимлари, жиноят ишлари бўйича Қорақалпоғистон Республикаси, Тошкент шаҳар, вилоятлар, туман (шаҳар) судларининг судьялари, ИИБ тергов бошқармалари бўлим бошлиқлари иштирок этдилар.

Мазкур тадбир фирибгарлик жиноятларини тергов қилиш ва судда кўрилишида, Жиноят процессуал кодексининг 416, 417-моддаларининг қўлланилишида тергов-суд амалиётидаги муаммолар ва тизимли камчиликларни аниқлаш ва муҳокама қилиш ҳамда ушбу нормаларни қўллашда ягона ҳуқуқни қўллашга эришиш борасида тушунтиришлар бериш мақсадида ташкил этилди.

Семинар давомида тадбир иштирокчилари томонидан фирибгарлик жиноятларининг салмоғи бошқа жиноятларга нисбатан юқори эканлиги таъкидланиб, ушбу тоифадаги жиноят ишларини қўзғатиш, тергов қилиш ва судда кўрилишида ҳамда Жиноят-процессуал кодекснинг 416, 417-моддаларини қўллашда юзага келаётган муаммолар муҳокама қилинди.

Тадбир иштирокчиларининг маърузаларида аниқ мисоллар асосида тергов-суд амалиётида йўл қўйилган камчиликлар хусусида тушунтиришлар бериб ўтилди.

Жойларда мавжуд муаммоларни илгаридан ўрганган ҳолда, улар юзасидан муҳокамалар ўтказилгани, вебинар жараёнида тушунтиришлар берилгани иштирокчилар томонидан тадбирнинг амалий натижадорлиги кўрсаткичи сифатида эътироф этилди.

Тадбир якунида амалдаги қонунчиликни такомиллаштириш борасида ҳам бир қатор таклифлар илгари сурилиб, иштирокчилар қизиқтирган саволларига жавоб олдилар ва фикр алмашдилар.