Иккинчи ярим йилликка янги режалар билан

2020 йилнинг 30 июнь куни Бош прокуратура Академияси Кенгашининг навбатдаги йиғилиши бўлиб ўтди.

Йиғилишда Академиянинг 2020 йил иккинчи ярми учун мўлжалланган иш режаси лойиҳаси муҳокама қилинди. Унда Академия фаолиятининг самарадорлигини ошириш ва такомиллаштириш, замонавий педагогик ва ахборот-коммуникация технологияларини қўллаган ҳолда прокуратура ходимларини тайёрлаш, қайта тайёрлаш ва малакасини ошириш, прокуратура органлари фаолиятини илмий-методик жиҳатдан таъминлашга қаратилган ўқув-услубий ва илмий-амалий тадбирлар ҳамда таълим, илмий-тадқиқот муассасалари ва бошқа ташкилотлар билан самарали идоралараро ва халқаро ҳамкорликни амалга ошириш масалалари назарда тутилди.

Кенгаш томонидан Академия докторант ва мустақил изланувчиларининг илмий-тадқиқот фаолиятининг мониторинги натижалари ҳақидаги масала кўриб чиқилди ҳамда илмий салоҳиятни кучайтириш йўлида тегишли талабгорлар илмий унвонга тавсия этилди.

Бош прокуратура Академияси магистратурасида якуний давлат аттестация синовларини ташкил этиш масаласи, ҳуқуқни қўллаш амалиёти ва қонунчилик муаммоларини ўрганиш бўйича лаборатория фаолияти тўғрисида низом муҳокама қилинди.

Шунингдек, Академия профессор-ўқитувчилари томонидан тайёрланган нашрлар муҳокама қилиниб, кун тартибидаги масалалар бўйича тегишли қарорлар қабул қилинди.