«Ўзбекистонда коррупцияга қарши курашиш чора-тадбирларни такомиллаштириш» мавзусида тадбирлар ўтказилмоқда

Ўзбекистон Республикаси Президентининг 2020 йил 29 июндаги «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги ПФ–6013-сонли Фармони ижроси доирасида Бош прокуратура Академияси томонидан халқаро ҳамкорлар кўмагида «Ўзбекистонда коррупцияга қарши курашиш чора-тадбирларни такомиллаштириш» мавзусидаги туркум тадбирлар ўтказилмоқда. 

2020 йил 7 июль куни «Коррупцияга қарши курашувчи янги орган: олдини олиш ва назоратнинг амалий модели» мавзусида халқаро онлайн давра суҳбати ўтказилди. Тадбирда Бош прокуратура раҳбарияти ва ходимлари, Иқтисодий ҳамкорлик ва тараққиёт ташкилоти, БМТнинг Наркотик ва жиноятчиликка қарши бошқармаси, Европада хавфсизлик ва ҳамкорлик ташкилоти, Латвия, Сербия, Словения, Руминия, Франция, Украина давлатларидан хорижий экспертлар, шунингдек миллий экспертлар иштирок этдилар.

Давра суҳбати иштирокчиларига янги ташкил этилган Агентликнинг мақсадлари, вазифалари ва фаолиятининг асосий йўналишлари тўғрисида маълумот берилди.

Хорижий экспертлар коррупцияга қарши курашиш мустақил органларининг ташкил этилиши ва уларнинг фаолият юритиши, коррупцияга қарши курашиш стратегияларини ишлаб чиқиш, вазирлик ва идораларнинг коррупциянинг олдини олиш ва унга қарши курашиш соҳасидаги фаолиятини мувофиқлаштириш, мазкур масалаларда давлат органлари, оммавий ахборот воситалари, фуқаролик жамияти институтлари ва нодавлат секторининг бошқа вакиллари ўртасида самарали ҳамкорликни ташкил этиш борасидаги хорижий тажриба ҳақида маълумот беришди.

Ўзаро тажриба алмашиш чоғида экспертлар томнидан Агентликнинг ташкил этилиши мамлакатда коррупцияга қарши курашишда янги сифат босқич бошланганлиги таъкидланди.

Шунга кўра, коррупцияга қарши кураш соҳасида халқаро ҳамкорликни кенгайтириш, бу борада мавжуд илғор хорижий тажрибани жорий этиш, коррупциянинг олдини олиш ва унга қарши курашишнинг назарий ва амалий масалаларини ҳамда хорижий тажриба ва халқаро стандартларни ҳисобга олган ҳолда махсус ўқув дастурларини жорий этиш муҳим ҳисобланади.